«Alle» i New York (og mange andre) har ei meining om det som blir kalla det mest kjende juletreet i verda. Slik er det alltid. Det er sterke meldingar i aviser og sosiale medium.
Men plutseleg blei det noko positivt og hyggeleg å snakke om. I år hadde treet nemleg ei hyggeleg overrasking å by på, godt skjult blant det som mange meiner er eit lite tiltalande ytre.
Ugla har gitt treet positiv omtale i fleng.
– Det styggaste treet
Årets juletre ved Rockefeller Center er 23 meter høgt. Treet - av typen norsk gran - blei frakta til Manhattan frå Oneonta i staten New York, der det blei hogge, sist laurdag.
Kritikken let ikkje vente på seg. Det er, forsiktig sagt, tynt med granbar lengst nede på treet. Nokre meiner at treet er det styggaste som nokon gong har vore sett opp ved Rockefeller Center. Andre ser det som eit symbol på 2020 - rett og slett trist.
Dehydrert ugle i granbaret
Det var ein tilsett i transportfirmaet som fann ugla. Kona hans melde frå til Ravensbeard Wildlife Center i New York.
– Ugla blei funnen langt inne mellom svære greiner, dehydrert og svolten, men var elles i fin form, fortel Ellen Kalish, som er direktør ved senteret.
Kalish seier at det er snakk om ei hannugle av typen slipeugle (aegolius acadicus), ein av dei minste ugleartane. Ugla var til sjekk hos veterinær onsdag, og blir no tatt vare på av Ravensbeard Wildlife Center.
Tilbake til sitt rette element
– Ho får så mykje mus som ho berre vil. Eg synest dette er så hyggeleg, - at det var ein løyndom inne i juletreet, seier Kalish til New York Post.
Planen er å sleppe fuglen tilbake til sitt rette element i løpet av helga.
Ved Rockefeller Center blir treet no klargjort og pynta, og så blir lysa tende tidleg i desember. Utan ugla.