Straumen av båtar med menneske på flukt frå Tyrkia til Lesvos og andre greske øyer i nærleiken held fram med full styrke. Det er no rundt 25.000 flyktningar og migrantar i Hellas, og alle ynskjer å reise vidare til Vest-Europa.
Den såkalla Balkan-ruta er den mest populære, men no har fire land i området sett ned foten.
Strenge restriksjonar
EU-landa Kroatia og Slovenia, pluss Serbia og Makedonia, har gjort det klart at dei ikkje vil ta mot meir enn maksimalt 580 personar i døgnet. Sist veke varsla Makedonia at dei vil nekte innreise for afghanarar og at det er innført strengare dokumentkontroll for syrarar og irakarar.
Dette er årsaka til at Idomeni-leiren er fylt til brestepunktet med fortvilte menneske. I dag tidleg gjennomførte ein del av dei ein demonstrasjon med krav om at dei måtte få kome over grensa til Makedonia.
Eit fleire meter høgt piggtrådgjerde på makedonsk side av grensa stansar alle forsøk på å krysse grensa ulovleg. Det er kaldt, og eit kraftig regnvêr i går kveld har gjort sitt til å forverre dei alt vanskelege forholda i leiren.
Fleire på veg
I går fekk ingen passere grensa til Makedonia, i dag skal 100 ha fått løyve til å kome gjennom. Samstundes er stadig fleire på veg til grensa, mange av dei til fots.
Sist veke kunngjorde Austerrike at dei berre vil tillate at 80 personar kan søkje asyl pr. dag, og at dei maksimalt vil ta mot 32. 000 personar i året.
Austerrikske styresmakter har skulda Hellas for manglande evne til å vakte sine eigne grenser og for ikkje å stanse dei tusenvis av migrantane og flyktningane som er på veg til Vest-Europa.
Den greske presidenten, Prokopis Pavlopoulos, seier på si side at EU ikkje kan ignorere det faktum at enkelte medlemsland ikkje lever opp til forpliktingane sine, med klar adresse til Austerrike.
Oppsamlingsplass
Også forbundskanslar Angela Merkel i Tyskland opplever eit sterkt indre press for at landet skal ta mot færre flyktningar og migrantar. I fjor tok Tyskland åleine mot over ein million menneske.
Den greske regjeringa har tidlegare gjort det klart at landet ikkje vil godta å bli «ein oppsamlingsplass for menneske på flukt», men mange meiner at det er akkurat det som har skjedd. Det er ikkje berre på grensa til Makedonia at tusenvis av menneske er samla i overfylte leirar.
Det er store leirar på Lesvos og andre nærliggjande øyer, i hamnebyen Pireus, i hovudstaden Aten, i Diavata nær Thessaloniki, og mange sit fast i over 40 bussar på hovudvegen mellom Sør-Hellas og Nord-Hellas.