Trump skriv på Twitter at avtalen er i full effekt. Han karakteriserer påstandane frå Stormy Daniels som pengeutpressing. Han presiserer at avtalen med pornostjerna var av privat karakter, og at han ikkje brukte pengar frå valkampmidlane.
Trump har tidlegare nekta for at han kjende til utbetalinga til Stormy Daniels, men han står fast ved at dei to aldri har hatt eit seksuelt forhold.
– Skreiv under
Presidenten minner også om at Stormy Daniels, eller Stephanie Clifford som er det rette namnet hennar, har skrive under på at påstandane om at ho hadde hatt eit forhold til Trump, var falske.
Donald Trump brukar fleire Twitter-meldingar torsdag morgon Washington-tid for å få fram det han meiner. Han skriv blant anna at den private avtalen mellom dei to var av ein type som er vanleg blant kjendisar og velståande menneske.
Advokaten til Trump, Rudy Giuliani, sa i går at Trump hadde betalt tilbake 130.000 dollars som advokaten Michael Cohen betalte til Daniels. Fleire juristar meiner betalinga må oppfattast som eit ulovleg valkampbidrag, sidan det skjedde like før valet.
Dei meiner at betalinga må oppfattast som eit valkampbidrag, dersom hensikta var å bidra til at Trump vart valt til president.
Jusprofessor Richard L. Hasen ved Universitetet i Irvine i California seier dette om avsløringa om utbetalingane til Stormy Daniels:
– Det viktigaste er at dette undergrev argumentet om at Cohen handla åleine. Presidenten er direkte implisert.
Oppheving av teieplikt
Clifford/Daniels har saksøkt Donald Trump for ærekrenking. Ho har fortalt at ho hadde sex med Donald Trump i 2006, og at Michael Cohen betalte henne 130.000 dollars berre nokre få dagar før valet i 2016, for å få henne til å halde kjeft.
Her måtte ho signere ein avtale om ikkje å snakke om det, og ho prøvar no å få oppheva denne teieplikta.
Donald Trump startar ofte arbeidsdagen med å leggje ut meldingar på Twitter.