I byen Draz ropar folk slagord mot styresmaktene, trass i at det er innført eit forbod mot demonstrering.
– Me ofrar blodet og sjelene våre for Bahrain, ropa de fleire tusen demonstrantane som strøymde ut i gatene etter fredagsbøna.
Raserte symbolsk statue
På Perleplassen i hovudstaden Manama har styresmaktene i dag brukt gravemaskin og boreverktøy for å øydeleggja ei statue som hadde vorte sjølve symbolet for den pro-demokratiske rørsla i landet.
Boringa og gravinga gjekk føre seg i fleire timar før statua til slutt kollapsa i ein ruinhaug av sement og stål.
Statua bestod av seks søyler med ei perle i midten. Monumentet vart reist tidleg på 1980 talet til minne om danninga av Samarbeidsrådet for dei arabiske statane i Golfen (GCC).
Drap og arrestasjonar
Protestane i Bahrain tok til for over ein månad sidan. I løpet av den siste veka har styresmaktene gått hardt til verks for å få bukt med opprørarane.
I går vart seks opposisjonsleiarar rresterte, og onsdag vart minst to drepne og 200 skadde i samanstøytar i det sunni-styrte kongedømet.
Det vert rapportert om tilfeldige arrestasjonar og drap på sivile. Onsdag erklærte Kong Hamad av Bahrain unntakstilstand i landet i dei kommande tre månadene på grunn av den vedvarande uroa i landet.
- LES OGSÅ: Ryddet Perleplassen med tanks
Har hatt makta i 200 år
Opposisjonen krev djuptgåande demokratiske reformar i det sjiamuslimske landet som har vorte styrt av det same sunnimuslimske dynastiet i meir enn 200 år.
I dag er regimekritikarane nok ein gong på plass i gatene for å markera sin motstand mot unntakstilstanden og mot regjeringsstyrkane sin valdsbruk.
1000 saudiske soldatar og 500 politifolk frå Dei sameinte arabiske emirata vart nyleg sende inn i øystaten for å bistå regjeringsstyrkane med å slå ned på opprøret.
FN sjokkert over Bahrain
Sjefen for menneskerettar i FN, Navi Pillay, er kraftig sjokkert over styresmaktene si handtering av situasjonen.
– Styresmaktene er forplikta til å verna om borgarane sin rett til liv og helse. Etter rapportane me får, gjer dei det motsette. Det er heilt uakseptabelt, seier Pillay som fordømmer valdshandlingane i Bahrain.