Det var viseutanriksminister Khaled Kaaim som opplyste om nedskytinga på ein pressekonferanse i Tripoli laurdag kveld.
Kaaim kritiserte NATO for å tillata opprørarane å ta av med helikoptra til tross for FN-resolusjonen om ei flyforbodssone over Libya.
– NATO tek parti
Kaaim hevda ifølgje NTB at NATO støttar opprørarane, og stilte spørsmål om resolusjonen gjeld berre regimet eller begge partar.
Internasjonale luftstyrkar rykka i går ut, etter at eit jagarfly kontrollert av opprørarane tok av frå ei flystripe i nærleiken av Benghazi, aust i Libya. Flyet blei avskore av NATO-pilotane, og tvinga til å landa. Ifølgje forsvarsalliansen blei det ikkje brukt våpen i aksjonen.
NATO avviser kritikken frå det libyske regimet, og seier dei ikkje parti med opprørarane i Libya.
– Dette viser at me er upartiske. Flyforbodssona gjeld alle fly. Ei flyforbodssone er ei forbodssone, punktum, var bodskapen frå ein NATO-talsmann i går.
(Artikkelen held fram under biletet)
25 stridsvogner bomba
Kriginga mellom opprørssoldatane og regjeringsstyrkane held fram søndag, med meldingar om drepne og skadde i Misrata.
NATO seier til nyheitsbyrået AFP at internasjonale luftstyrkar har bomba 25 stridsvogner som tilhøyrte Gaddafi-soldatar i løpet av søndagen.
11 av stridsvognene blei øydelagde på vegen mot den austlege byen Ajdabiya . Dei andre 14 blei bomba i nærleiken av Misrata, lenger vest i landet.
Ifølgje ein talsperson for opprørarane, er minst fire menneske drepne i Misrata i dag. Laurdag skal meir enn 30 personar ha mista livet i dei blodige samanstøytane.