Mannen som vart arrestert i dag skal ha hatt kjennskap til 22-åringen, som framleis er på frifot. Spesialstyrkane aksjonerte mot eit husvære i eit bustadkompleks i byen, som ligg i delstaten Sachsen i det austlege Tyskland.
Den etterlyste syraren, Jaber Albakr, greidde å flykte då politiet i går aksjonerte mot eit anna husvære i Chemnitz. Dei såg han ved ytterdøra i bustadblokka, men han greidde å stikke av.
Funn av eksplosiv
Det var funne fleire hundre gram eksplosiv inne i husværet, og politiet meiner det er sannsynleg at den syriske flyktningen hadde planar om å gjennomføre eit terrorangrep.
Tre personar som truleg hadde hatt kontakt med Jaber Albakr vart arresterte av politiet i går ettermiddag, men to av dei er sette fri etter avhøyr.
Fleire hundre politifolk har jakta på 22-åringen sidan i går, men dei har ikkje greidd å få tak i han.
– Vi trur framleis at denne personen er ein trussel, seier Tom Bernhardt, talsmann for kriminalpolitiet i Sachsen.
– Kan vere farleg
Tyske styresmakter har varsla utanlandske tryggingstenester om den etterlyste syraren. Dei ber også publikum om hjelp, men åtvarar samstundes om at mannen kan vere farleg.
Nyheitsbyrået Reuters siterer ei tryggingskjelde på at det er god grunn til å tru at Jaber Albakr har islamistiske sympatiar, men at dei ikkje har bevis for at han er knytt til terrororganisasjonen IS. Kjelda meiner han like godt kan ha vorte radikalisert via Internett.
Jaber Albakr kom til Tyskland i fjor og er registrert som flyktning. Han var ikkje kjent av politiet før dei fekk tips frå tysk etterretning, eit tips som leidde til aksjonen mot husværet hans i går.
To IS-angrep i juli
Tysk politi er på tå hev etter to angrep der IS tok på seg skulda i juli i år. Det var først eit
nær Wuerzburg, og litt seinare i Ansbach. Rundt 20 menneske vart såra i desse angrepa, men ingen andre enn angriparane miste livet.Då politiet gjekk til aksjon mot bustaden til Albakr i går, vart rundt 100 personar evakuerte frå den feme etasjar høge bygningen. Eksplosiva vart vurderte til å vere så ustabile at dei ikkje kunne flyttast langt.