NRK Meny
Normal

Taliban storma fengsel – 350 på frifot

Over 350 fangar er på frifot etter at Taliban storma eit fengsel i byen Ghazni i Afghanistan.

Laster kart, vennligst vent...

Sjølvmordsbombarar frå den islamistiske Taliban-rørsla slo natt til måndag til mot eit fengsel i Ghazni. 350 fangar skal ha klart å rømma.

– Taliban-opprørarar kledde i militæruniformer gjekk til åtak på fengselet i Ghazni natt til måndag, opplyser viseguvernøren i Ghazni, Mohammed Ali Ahmadi.

Ifølgje viseguvernøren klarte 352 fangar å rømma frå fengselet som følgje av åtaket. 150 av desse var frå Taliban.

Tek på seg ansvaret i epost

Ein Reuters-reporter på staden seier at han såg dei døde kroppane til to menn som truleg var sjølvmordsbombarar og ein utbrend bil som skal ha blitt brukt til å sprengja inngangsporten til fengselet.

Taliban hevdar å stå bak «det vellukka »åtaket i ein epost sendt til media. Ein talsmann seier at menn med skytevåpen og bomber angreip fengselet klokka 02 natt til måndag lokal tid, og at alle fangane kom seg fri.

– Viktige militante mujahedinar (soldatar i heilag krig; journ.merk) er lauslatne, skriv ein talsmann for Taliban.

Sju opprørarar frå den islamistiske Taliban-rørsla og fire soldatar frå dei afghanske tryggingsstyrkane vart drepne i åtaket, ifølgje lokale styresmakter.

Ghazni ligg om lag 120 kilometer sørvest for hovudstaden Kabul.

Taliban kjempar for å styrta det vestleg-støtta regjeringa til president Ashraf Ghani, utvisa utanlandske styrkar frå landet og innføra eit styre basert på islam og strenge sharialovar.

Laster innhold, vennligst vent..
Laster innhold, vennligst vent..

SISTE NYTT

Siste nytt