Dei første meldingane som tikka inn om måndagens angrep fortalde om 12 døde, men utover måndagen har talet vakse til over 126 drepne menneske i angrepet på eit treningssenter for afghansk etterretning i Maidan Shahr, nokre få mil sør for hovudstaden Kabul.
– Me har informasjon om at 126 menneske er drepne i ein eksplosjon inne på treningssenteret, deriblant åtte spesialsoldatar, fortel ei høgtståande kjelde i det afghanske forsvarsdepartementet til nyheitsbyrået Reuters.
Eksplosjon og skyting
Taliban utfører angrep dagleg, og militære kjelder seier det i snitt vert drepe 35 medlem av afghanske tryggingsstyrkar kvar dag, men måndagens angrep er uvanleg stort.
Det starta med ein bileksplosjon utført med ein militær Humvee-bil som angriparane hadde teke frå afghanske regjeringsstyrkar. Etter bileksplosjonen starta dei tre angrepsmennene å skyte inne på det militære området.
Dei tre angriparane hamna etter kvart i skotveksling med afghanske tryggingsstyrkar, og dei tre mennene vart til slutt drepne. Men dei klarte altså å drepe over 100 afghanske soldatar før angrepet var over. Det er nyheitsbyråa AFP og Reuters som formidlar dette.
- LES OGSÅ:
- LES OGSÅ:
Fredssamtalar på ny måndag
Angrepet skjer same dag som Taliban tek opp att tråden med USAs spesialutsending for Afghanistan, Zalmay Khalizad, i Qatar. Der vert det forhandla om ein avtale som kan sette punktum for 17 år med krig i det asiatiske landet.
NRK har tidlegare skrive om korleis Taliban utfører angrep samstundes som dei driv med fredssamtalar. Afghanistan-ekspert og fredsforskar ved institutt for fredsforsking, PRIO, Kristian Berg Harpviken, seier dette vert gjort av Taliban for å vise styrke og for å posisjonere seg godt for forhandlingar.
Ifølge militære kjelder i landet vert det for tida drepe 35 afghanske tryggingsstyrkar kvar dag i gjennomsnitt.
USA har trappa opp forsøka på å forhandle fram ei løysing som kan bidra til ein fredsavtale, slik at utanlandske styrker kan forlate Afghanistan. Men samtalane som starta 17. desember i fjor har gått trått, mellom anna fordi Taliban ikkje ønskjer at den afghanske regjeringa skal vere ein part i forhandlingane.
Taliban har kravd å forhandle om fred direkte med USA, og ikkje via den afghanske regjeringa som dei kallar «marionettane i Kabul».
Over 20.000 utanlandske soldatar att
I august i fjor sa Harpviken til NRK at også USA ville starte direkte samtaler med Taliban, for å få fortgang på fredssamtalane.
– No har også USA sagt at regjeringa i Kabul må godta forhandlingar mellom Taliban og USA. Tolmodet til amerikanarane er i ferd med å ta slutt, alt tyder på at president Donald Trump vil ut av Afghanistan. Difor er også mange uroa for at ein får ei for rask uttrekking og at styresmaktene i USA ikkje har tolmod nok til å forhandle fram ein god avtale, sa Harpviken i fjor.
- LES OGSÅ:
Taliban har i dag kontroll over store område av landet. Det var Taliban som regjerte i Afghanistan då USA vart utsett for fleire store terrorangrep den 11. september 2001, der Taliban og Al Qaida vart skulda for å stå bak.
Men sjølv om Taliban etter kvart vart erstatta av ei ny regjering har ikkje kampane i Afghanistan teke slutt. No har Nato sett punktum for sine operasjonar, men det er likevel over 20.000 utanlandske soldatar att i Afghanistan, deriblant nokre norske.
