Den militære flyplassen Kweires har vore omringa av den islamistiske terrororganisasjonen IS i over to år. Fleire tidlegare forsøk på å bryte blokaden har vore mislukka, men i dag lukkast regjeringssoldatane.
AFP melder at ei gruppe soldatar greidde å bryte seg gjennom blokaden vest for flyplassen, slik at dei greidde å ta seg inn på sjølve flybasen.
– Kan opne for russiske fly
Syrian Observatory for Human Rights (SOHR) opplyser at regjeringsstyrkane hadde støtte frå libanesiske Hizbollah og frå iranske og syriske militssoldatar i kampane. SOHR melder også at IS har henta forsterkingar til området, og at dei kan førebu eit motangrep.
Ei militær kjelde seier til nyheitsbyrået Reuters at den syriske hæren no jobbar med å sikre flybasen, der soldatane har vore under angrep frå IS i over to år. Det har ikkje vore mogleg å få inn forsyningar til basen.
Straks basen er ferdig sikra, så vil også russiske fly kunne bruke han i sine angrep mot IS og andre opprørsgrupper, seier kjelda.
Det statlege syriske fjernsynet viste direktebilete frå basen i dag, og ein utsliten, men entusiastisk reporter annonserte at blokaden var broten. Samstundes vart det spelt militærmarsjar og vist arkivbilete av militærøvingar, melder Reuters.
– Kjem aldri til å knele
– Vi dediserer denne sigeren til president Bashar al-Assad, og vi lovar han å halde fram kampen heilt til heile Syria er fritt igjen. Vi kjem aldri til knele for IS, sa ein av dei syriske soldatane på telefon til fjernsynsstasjonen.
Soldatar som hadde vore innestengde på basen dei siste to åra, fekk snakke med familiemedlemer direkte på fjernsyn.
Dette er den første større framgangen til den syriske regjeringshæren sidan Russland starta sin bombekampanje mot opprørsgrupper 30. september. Militære kjelder seier til AP at dei russiske bombeangrepa har vore medverkande til at regjeringsstyrkane greidde å bryte IS-blokaden i Aleppo i dag.
Det statlege fjernsynet melder at fleire titals IS-krigarar er drepne i kampane i dag. Ein soldat inne på basen seier at dei fann fleire hundre døde IS-krigarar inne på området.
Angrep mot Latakia
Medan regjeringsstyrkane har hatt framgang i Aleppo-provinsen, så gjekk IS til eit kraftig granatangrep mot den regimekontrollerte byen Latakia, eitt av dei områda i Syria der Assad-regimet har sterkast støtte. Angrepet var retta mot dei austlege bydelane i Latakia, og eit universitetsområde vart ramma, melder nyheitsbyrået AFP.
Ifølgje syrisk fjernsyn vart 22 menneske drepne og 62 andre såra i angrepet.
Over 250.000 menneske er drepne sidan borgarkrigen i Syria starta i mars 2011. Fleire millionar menneske er på flukt.