NRK Meny
Normal

Sudan feirar gjenerobring av oljefelt

Nær sagt alle som kunne krype og gå, tute og kjøre, samla seg utanfor Forsvarsdepartementet i Khartoum i går ettermiddag for å feire at Sør-Sudan var på veg ut av oljefeltet Heglig.

Omar al-Bashir framfor tilhengarar utanfor forsvarsdepartementet i Khartoum

President i Sudan, Omar al-Bashir, snakkar til tilhengjarar framfor Forsvarsdepartementet i Khartoum

Foto: MOHAMED NURELDIN ABDALLAH / Reuters

Feiring av at Sør-Sudan trekker seg ut av Heglig

Folk vifta med sudanske flagg under feiringa utanfor Forsvarsdepartementet i Khartoum.

Foto: MOHAMED NURELDIN ABDALLAH / Reuters

«Allah Akbar, Gud er størst » ljoma det mot hærleiinga i Sudan som i nesten fjorten dagar hadde lova at det invaderte grenseområdet Heglig skulle bli gjenerobra frå Sør-Sudan i løpet av få dagar.

– Eg er veldig glad for denne sigeren, fordi fienden prøvde å knekke trua, religionen og landet vårt, seier Altom Abdallah Yosef under feiringa framfor Forsvarsdepartementet.

Sør-Sudan trekkjer seg ut

Sør-Sudan lovde i går å starte å trekkje ut soldatane sine frå det omstridde Heglig-området i Sudan innan tre dagar.

– Ei ordna tilbaktrekking skal starte med ein gong, og den skal vere ferdig i løpet av tre dagar sa informasjonsminister Barnaba Marial til journalistar i Juba i går.

SPLA-tropper på vei fra Bentiu til Heglig

SPLA-troppar på veg frå Bentiu til det oljerike grenseområdet Heglig

Foto: ADRIANE OHANESIAN / Afp

Sudan svarte med ei storslått feiring framfor Forsvarsdepartementet i Khartoum.

al-Bashir hissar folket med militærmusikk

Oppladinga til feiringa hadde presidenten i Sudan sørga for.

På fleire folkemøte dei siste dagane, med militærmusikk og jublande tilhengarar, har Omar al-Bashir fortalt at nabolandet i sør trakka over ved å rykkje inn i Heglig.

Presidenten har lova at dei skulle få ein lærepenge som Salva Kiir og regjeringa i Juba i Sør-Sudan ikkje kom til å gløyme, og kunngjorde eit nytt slagord:

Sudan President Omar al-Bashir

President i Sudan, Omar al-Bashir, er ikkje perleven med leiinga i Sør-Sudan

Foto: MOHAMED NURELDIN ABDALLAH / Reuters

«Vi skal frigjere Sør-Sudanarane frå insekta som styrer dei»

Ikkje alle feirar

Tidlegare statsminister i Sudan, Al-Sadiq Al-Mahdi er ikkje glad for utviklinga etter at Sør-Sudan okkuperte det oljerike grenseområdet.

– Vi er svært lei oss for denne utviklinga, vi hadde planlagt ein omfattande fredskonferanse der alle dei uløyste spørsmåla med Sør-Sudan skulle bli tatt opp, seier Al-Mahdi.

– Og så skjer denne innrykkinga i Heglig og kamphandlingane i grenseområdet i staden for.

Fryktar krig

President Omar Hassan al-Bashir

al-Bashir snakkar til feirande tilhengjarar framfor Forsvarsdepartementet i Khartoum etter at Sør-Sudan trekte seg ut av Heglig

Foto: MOHAMED NURELDIN ABDALLAH / Reuters

På gatenivå i Karthoum har frykta for ein meir omfattande krig med Sør-Sudan meldt seg. Folket ønskjer ikkje krig.

Den over tjue år lange borgarkrigen som enda med ein fredsavtale i 2005, kravde millionar av menneskeliv på begge sider.

– Du finn ikkje ein einaste familie i Sudan som ikkje har eit medlem anten i eller knytt til hæren, seier Nasir Raham, som har ein bror i Sudan sin hær i grenseområdet i Sør.

– Ein må unngå ein ny, full krig for kvar ein pris, meiner han.

Meiner Sør-Sudan er utakksame

Likevel har militærmusikken og Omar al-Bashir sin krigsretorikk gitt gjenklang hjå mange sudanarar. Dei føler at Khartoum strekte seg langt då Sør-Sudan fekk halde folkerøysting og reiv seg laus frå Sudan i fjor.

Og så kjem takka, slik sudanarane oppfattar det, i form av ein okkupasjon av oljefeltet Higlig på sudansk jord.

Avisseljaren Elsir Gualsmalsead i sentrum av Khartoum kallar det for forræderi.

– Og bak sviket står USA og Israel og andre vestlege land som prøvar å tene pengar på det, seier Gualsmalsead.

Men no er Sør-Sudan si erobring av Heglig snart historie med ei feiring i Khartoum som varte til ut på morgonkvisten i dag.

Laster innhold, vennligst vent..
Laster innhold, vennligst vent..

SISTE NYTT

Siste nytt