Både Russland og NATO har dei siste vekene auka aktiviteten i Svartehavet. Og på land hardnar ordkrigen til.
Russisk general er uroa over høg NATO- aktivitet
Den russiske generalen Anatoli Nogovitsin, seier han er bekymra for det han kallar eit ”ekstremt” aktivitetsnivå frå NATO si side i Svartehavet.
- Berre i går sigla ni NATO-skip i Svartehavet og ytterlegare åtte er på veg, seier Nogovitsin til nyhendebyrået AFP.
Dei snakkar om øving, og det er kanskje sant, men det er vanskeleg å tru at alle skipa driv med humanitær hjelp, seier Nogovitsin.
NATO har marineøving
NATO vedgår at dei har auka aktivitet i Svartehavet, men seier at dette er grunna ei marineøving som har vore planlagt i lengre tid.
- Russland er informert om at den bulgarske og rumenske marinen er vertar for ei marineøving i Svartehavet, seier kontreadmiral Juan Rodriguez.
Han legg til at øvinga ikkje på nokon måte er knytte til konflikten i Georgia.
- Desse skipa vil ikkje delta i den humanitære hjelpeaksjonen til Georgia, seier Rodriguez.
Marinefartøya som tilhøyrer NATO si maritime gruppe nummer 1, er stasjonerte i den rumenske hamnebyen Constanta fram til slutten av månaden. Spanske, polske, tyske og amerikanske marinefartøy deltek i øvinga.
Russland skuldar USA for å levere våpen
Men marineøvinga kjem på eit tidspunkt då det er auka spenning i Svartehavet. Det er framleis usikkert om amerikanske marinefartøy får lov til å legge til kai i den georgiske hamnebyen Poti, som er kontrollert av russiske styrker.
USA seier krigsskipa ikkje er på militært oppdrag. Dei skal berre levere humanitær hjelp. Amerikanske krigsskip har allereie landa i den mindre hamnebyen Batumi.
Men den russiske presidenten Dmitrij Medvedev, skuldar dei amerikanske marinefartøya for å ha uredelege hensikter. Nemleg å forsyne Georgia med våpen.
- Det er ingen blokade av Poti, alle skip kan komme seg inn, amerikanske og andre som har med seg humanitær hjelp, seier Medvedev i eit intervju med BBC.
- Men det amerikanarane kallar humanitær hjelp, er sjølvsagt våpenforsyningar, legg han til.
USA nekter på at dei leverer våpen
Men USA har avvist skuldingane som grunnlause.
- Vi ventar oss at framkomsten til Poti og distribueringa av humanitær hjelp vil gå smertefritt, seier talsmann i Det kvite huset, Bryan Whitman.
Det amerikanske krigsskipet USS McFaul er venta i Poti på onsdag og fleire er på veg.