Nixon hos Mao. Reagan og Gorbatsjov i Reykjavík. Rabin og Arafat sitt nølande handtrykk framfor Det kvite hus.
Tidsbilete og symbolikk frå nær historie. Biletet av Trump og Kim føyer seg til lista.
Det er historia om 2018. Om uvisse og risiko. Med atomvåpen som innsats.
- Les meir:
- Les også:
Sterke menn og store ego
Det er også ei historie om sterke menn i vår tid. Den eine leier verdas mektigaste demokrati, den andre verdas mest lukka diktatur.
I 2018 er altså eit møte mellom dei mogeleg. Under eitt år etter Trumps salve frå FNs talarstol: «rakettmannen er på sjølvmordstokt», og Kims svar: «eg vil temme denne senile gubben med eld». I fjor skalv verda for kva ordkrigen mellom leiarane for to atommakter kunne føre til.
Då Kim påpeika at han faktisk hadde ein atomknapp, svara Trump på Twitter: «Min atomknapp er større enn din»
Mobbing og brutalitet
Dei to er bølla og tyrannen. Trump mobbar på Twitter, «rakettmannen» er berre eitt av mange tilnamn hans motstandarar må tole, det er ein oppførsel dei fleste ville slå ned på hos eigne born. Men politisk har Trump demonstrert evne til å ta den risiko han meiner krevst.
- Les også:
Kim er i utgangspunktet vår tids absurde diktator med sine gigantiske paradar. Ein framtoning mest til å le av om det ikkje var for hans atomvåpen og grenselause brutalitet. Kim er tyrannen som ikkje nøler med å ta livet av opponentar eller la folket svelte. Men no åtvarar ekspertar mot å undervurdere Kim sine strategiske evner.
For i samband med OL i vinter skjedde eit skifte. Sør-Koreas president inviterte utøvarar frå nord, og dei kom. Kim erklærte stans i prøvesprengingane, og Trump snakka om eit mogeleg toppmøte. I vår var Kim på besøk hos presidenten i sør, og no møter han altså Trump. Ein triumf i seg sjølv.
- Les også:
Ein verdsorden i endring
Men i opptakten var det eit heilt anna bilete som dominerte.
Biletet frå helga av ein innbiten Trump, sittande på ein stol under G7-møtet i Canada, med USA sine tradisjonelle vener hengande over seg. Merkel, Macron og Trudeau er tilsynelatande sinte og oppgitte over hans handelspolitikk og straffetoll.
Det enda i kollaps og Twitter-fornærmingar.
Dette er også eit bilete på vår tid. Tradisjonelle alliansar vaklar, den verdsorden som blei etablert etter andre verdskrigen er i spel.
2018 er året då USA trakk seg frå Iran-avtalen og andre internasjonale avtalar. Og sådde tvil om USA si underskrift er til å stole på.
- Les også:
Tyrannar med og utan atomvåpen
Trump og Kim snakkar om atomvåpen i Singapore. For det er hans våpenkraft – med kapasitet til å gjere enorm skade i Sør-Korea og Japan, kanskje også nå USAs fastland – som først og fremst skil Kim frå andre tyrannar i vår tid. Som Saddam.
Det er atomtrusselen som er hovudgrunnen til at Kim blir avbilda med Trump i Singapore, mens Saddam enda i galgen. Skal tru kva prestestyret i Iran tenker om akkurat det i desse dagar?
Suksess?
Tema for møtet i Singapore er altså å avskaffe våpena som fekk det i stand. Få trur det er nært føreståande, men ein prosess er i gang.
2018 er året då det meste kan skje. Og ingen heilt veit korleis det går. Med dei to på biletet, og oss andre.