Episoden skjedde i Ust-Ilimsk, på eit kontor der menn som er innkalla i samband med Vladimir Putins mobiliseringsordre, blir bedne om å melde seg. Det skriv den lokale guvernøren i meldingsappen Telegram.
I ein video publisert på sosiale medium skal mannen ha identifisert seg sjølv som 25 år gamle Ruslan Zinin, ifølge Reuters.
Ein separat video skal vise at den same mannen skyt minst eitt skot inne på mobiliseringskontoret. Videoane har ikkje blitt verifiserte frå uavhengig hald.
Guvernøren for Irkutsk-regionen, Igor Kobzev, skriv vidare at sjefen for mobiliseringskontoret er på sjukehuset og at tilstanden hans er kritisk.
Han lovar i den same meldinga at gjerningsmannen skal bli straffa.
Irkutsk ligg like nord for grensa til Mongolia, og har eit lite folketal spreidd over eit stort areal.
Etter at Putin kunngjorde at 300.000 reservistar skal kallast inn for å delta i det russiske styresmakter omtaler som spesialoperasjonen i Ukraina, har mange russiske menn fått beskjed om å møte på mobiliseringssentera.
Foreløpig ser det ut som om langt fleire har vorte kalla inn i meir avsidesliggjande område enn i dei store byane.
Fleire har klaga over av innkallinga ikkje følgjer nokon klare retningslinjer, og at det heile verkar kaotisk. Kritikken har også kome frå personar som står Kreml nær.
Reservistar kjem fram til militærbasane
Dei første styrkane som er kalla inn til den delvise mobiliseringa har kome fram til militærbasane i Russland. Det melder britisk etterretning måndag ifølge Reuters.
– Russland står no ovanfor ei administrativ og logistisk utfordring i det å trene opp desse styrkane, heiter det i den skriftlege oppdateringa.
Mange av menneska som har blitt kalla inn til teneste har ikkje vore i militæret på fleire år, står det vidare.
Sist veke sa den russiske presidenten Vladimir Putin at han hadde signert eit offentleg påbod om delvis mobilisering, som startar onsdag.