Senator Nicola Di Girolamo er senator i det italienske parlamentet. Han kjem frå Calabria heilt sør på det italienske fastlandet, og han representerer Silvio Berlusconi sitt regjeringsparti PDL, melder det italienske nyheitsbyrået
.Han vart innvald i parlamentet av italienarar i utlandet.
Han leverte inn avskilssøknaden sin i dag, kort tid før ein parlamentskomite var venta å gi klarsignal for at han kan bli arrestert. Italienske senatorar har i utgangspunktet immunitet, men ein komite i parlamentet kan oppheve denne immuniteten.
- Omfattande valfusk
Den italienske påtalemakta meiner Di Girolamo vart innvald til parlamentet som representant for italienarar i utlandet ved hjelp av omfattande valfusk, organisert av 'Ndrangheta-mafiaen.
'Ndrangheta er heimehøyrande i Calabria, og blir i dag rekna som den mektigaste og mest brutale av dei italienske mafiaorganisasjonane.
Det var sist veke at italiensk politi namngav Di Girolamo i ei sak der han og 55 andre blir skulda for å ha kvitvaska 2,4 milliardar euro, over 1,7 milliardar norske kroner. Dette er pengar som skal vere tente på kriminell verksemd.
Dette kjem i tillegg til skuldingane om valfusk og band til mafiaen.
Avviser skuldingar
Nicola Di Girolamo avviser skuldingane mot han på det sterkaste, og han meiner kollegaene hans i parlamentet nærmast har framstilt han som Lucifer.
- Eg vart innvald i Senatet av 24.500 veljarar, som ikkje er korkje mafiamedlemer eller kriminelle, skriv han i avskilsbrevet, stila til presidenten i den italienske nasjonalforsamlinga. Han vedgår likevel i brevet at nokre av dei som røysta på han kan ha hatt kontaktar med mafiaen.
Di Girolamo seier han er sikker på at han i møtet med den italienske påtalemakta vil klare å reinvaske seg, og han legg til at han no legg saka i hendene til Gud.
Sist torsdag publiserte vekeavisa L'Espresso fleire bilete av Di Girolamo saman med 'Ndrangheta-toppen Franco Pugliese og forretningsmannen Gennaro Mokbel, mannen politiet meiner er hovudmannen bak den store kvitvaskingssaka.
Pugliese og Mokbel varrt arresterte sist tysdag
Arena-klanen
Pugliese er ein av toppane i Arena-familien, som igjen er blant dei mekgiaste klanane i 'Ndrangheta. Sonen hans Michele vart arrestert saman med 33 andre mafiamedlemer i november i fjor.
Statsminister Silvio Berlusconi sa i helga at han aldri har møtt Niccola Di Girolamo.
Di Girolamo tilhøyrde partiet Nasjonalalliansen, som slo seg saman med Berlusconiss Forza Italia og blei til PDL.