Den velrenommerte avisa skriv i dag at Terje Rød-Larsen, på oppdrag for FNs generalsekretær Kofi Annan, kjem til å leggje fram klare krav til Syria.
Syrias president Bashar Assad skal møte Terje Rød-Larsen i Damaskus. (Foto: Reuters/Scanpix)
Straffetiltak
Full tilbaketrekking frå Libanon etter FN-resolusjon 1559. Om Syria ikkje godtek dette, må landet rekne med økonomiske straffetiltak og politisk isolasjon.
Ei FN-kjelde seier til Washington Post at det internasjonale samfunnet er uvanleg samstemt i denne saka.
Før møtet i Damaskus i morgon har Terje Rød-Larsen hatt møte med amerikanske, europeiske og arabiske topp-politikarar for å samle støtte.
I går møtte han Egypts president Hosni Mubarak i Sharm el Sheikh, og også her skal Rød-Larsen ha fått støtte for FN sitt syn.
Arabisk støtte
Tidlegare denne veka skal han etter det Washington Post veit også fått støtte frå generalsekretæren i Den arabiske liga, Amr Moussa.
FN-kjeldene seier til Washington Post at Terje Rød-Larsen er overraska over den sterke støtta for kravet om full syrisk tilbaketrekking frå Libanon, også i arabiske land.
Rød-Larsen skal presentere fire krav overfor Syrias president Bashar Assad i morgon:
Syria må godta at Libanon er ein sjølvstendig stat, og må love ikkje å hindre gjennomføringa av frie parlamentsval i landet denne våren.
Timeplan
For det andre må Assad presentere FN for ein komplett timeplan for tilbaketrekkinga av dei syriske styrkane frå Libanon.
For det tredje må Assad leggje fram ein timeplan for tilbaketrekking av 5000 syriske etterretningsagentar frå Libanon.
Endeleg skal Terje Rød-Larsen diskutere andre krav i resolusjon 1559, som avvæpning og oppløysing av utanlandske og nasjonale militsgrupper som oprerer i Libanon.
FN er likevel viljug til å vente til etter at det er valt eit nytt parlament, å¨gå inn på dette spørsmålet. I dag er det stort sett berre Hizbolla-geriljaen som er igjen av militsgruppene i Libanon.
Svak økonomi
Tidlegare amerikansk ambassadør i Syria, Theodore H, Kattouf, seier at syriske styresmakter er svært redde for å bli isolerte. Dei har ein svak økonomi, og hadde ikkje greidd seg om dei ikkje hadde fått hjelp frå andre land.
Han nemner store utbetalingar frå Saudi-Arabia og Kuwait for støtta under krigen for å jage Irak ut av Kuwait i 1990-1991, og gratis olje frå Iran på 1980-talet.
Før det har dei kjøpt svært billeg olje frå Saddam Hussein, og under den kalde krigen fekk landet svært mykje militært utstyr frå Sovjetunionen.
Terje Rød-Larsen diskuterte Syria med EUs utanrikssjef Javier Solana tidlegare denne veka. (Foto: AFP/Scanpix)