Rock and roll-veteranen Fats Domino er død

Dottera opplyser at han døydde fredfullt med familien sin rundt seg.

Songaren, komponisten og pianisten Fats Domino blir rekna som ein av dei som la grunnsteinen for musikkforma vi i dag kallar rock. Han er mest kjend for låtane «Blueberry Hill» og «Ain't that a Shame». Innspelinga hans av «The Fat Man» i 1949 blir av ein del av ekspertar karakterisert som den første rock and roll-plata nokon gong.

65 millionar plater

Antoine «Fats» Domino jr. vart fødd i 1928 i New Orleans i delstaten Louisiana. I løpet av livet selde han 65 millionar plater, følgje New York Daily News. Han fekk prisen National Medal of Arts av USAs dåverande president Bill Clinton i 1998.

Døypenamnet hans er Antoine, men han fekk tilnamnet «Fats» fordi han alltid var ein røsleg kar, og fordi namnet på første albumet hans i 1949 heitte «The Fat Man». Seinare adopterte han namnet sjølv og kalla seg berre «Fats»

– Han var ein av dei store rock and roll-stjernene på 1950-talet. Kommersielt var det berre Elvis Presley som var større. Fordi han var svart tok han denne musikken ut til eit kvitt publikum, kanskje meir enn nokon andre på den tida, seier musikkjournalist i Aftenposten, Asbjørn Bakke.

Han fortel at Fats Domino hadde ein brei appell med den runde, varme røysta og dei svingande pianolåtane sine.

Juke Box-favoritt

Då han var på toppen av karrieren sin var han ein av dei sterkaste rivalane til Elvis Presley om å ha tittelen kongen av Rock and roll. Men han var blyg av natur og mangla den utagerande sceneframferda til Elvis.

Heimbyen New Orleans er ein smeltedigel av ulike kulturar og dermed også av musikk. Fats Domino henta inspirasjon frå den svarte musikken, blues og rhythm and blues, og han kombinerte det med rock and roll

Ifølgje nyheitsbyrået AFP var Fats Domino ein av dei store juke box-favorittane i USA på 50-talet. Han var ein av dei første som vart innlemma i Rock and Roll Hall of Fame, saman med legendene Elvis Presley og Chuck Berry.

Var sakna etter «Katarina»

I ein kort periode etter den øydeleggjande orkanen «Katrina» i 2005 var Fats Domino ein av dei sakna. Han vart evakuert frå heimen sin, og han hadde ikkje blitt registrert. Han og familien måtte reddast ut med båt, og han miste tre piano og fleire titals gull- og platinaplater.

Seinare same året gav han ut det siste albumet sitt, «Alive and Kicking».

Han gav inntektene frå denne plata til artistar som var ramma av «Katrina».

Trass i store inntekter frå musikken flytta han aldri frå det fattige området i New Orleans der han vart fødd i 1928. Han var trufast mot både byen og menneska der, blir det sagt om han.

Dei siste ti åra heldt han svært få konsertar, men han heldt god kontakt med musikkmiljøet i heimbyen.