Tidlegare i dag hevda opposisjonen at dei hadde vunne både president- og parlamentsvalet.
No har det kome offisielle tal som syner at opposisjonspartiet MDC får minst halvparten av dei 210 plassene i nasjonalforsamlinga og at regjeringspartiet ZANU-PF får minst 93 representantar.
Det offisielle resultatet frå presidentvalet drøyer framleis.
Over 50 prosent
Utrekningane opposisjonspartiet MDC presenterte tidlegare i dag synte at opposisjonsleiar Morgan Tsvangirai fekk 50,3 prosent av røystene, medan sitjande president Robert Mugabe fekk 43,8 prosent.
Sjå video:
Ein talsmann for partiet til Robert Mugabe kalla desse resultata for "ønsketenking".
- President Mugabe går ingen stader. Vi har ikkje tenkt å la oss presse til noko som helst, uttalte informasjonsminister Bright Matonga til tvkanalen Sky.
Sein levering
Styresmaktene i Zimbabwe har fått krass kritikk for at dei har vore seine med å offentleggjere resultat frå valet.
Generalsekretær Tendai Biti i MDC meinte på ein pressekonferanse tidlegare i dag at resultata har drøyd fordi regjeringa omarbeider desse med sikte på ein andre valomgang om tre veker.
- Treng ingen andre omgang
Den statlege avisa Herald skreiv i dag at det må haldast ein ny runde i presidentvalet fordi ingen av kandidatane har fått meir enn 50 prosent av røystene.
Les:
Dette avviser opposisjonen.
- Tsvangirai har gått over 50 prosent og treng ikkje ein andre omgang for å verte valt, seier Biti.