Eit fullvakse antilopeliknande hjortedyr vart pytonslangen sitt offer i ein dyrepark i den indiske delstaten Andhra Pradesh denne veka.
Slangen greidde å kome seg inn i innhegninga til hjortedyra, og dyret var sjanselaust mot den krypande slukhalsen.
Og hjortedyret, med lange horn, viste godt i magen til pytonslangen.
Etterpå var han så mett at han ikkje greidde å røre seg, han kom berre med nokre skikkelege geisp. Kanskje forstod han etterkvart at han hadde forsynt seg vel grovt denne gongen.
Leiinga i dyreparken seier at dei har gjort alt dei kan for å hindre at slikt skal skje, men at pytonslangen truleg har greidd å kome seg inn til hjortedyra gjennom eit hol i gjerdet dei ikkje har oppdaga.
Den overmette og rørslehemma slangen vart pakka i ein sekk og køyrt ut i jungelen. No skal han prøve eit liv utanfor murane til dyreparken.