SISTE: No har det russiske føderasjonsrådet vedteke Putin sitt dekret.
Dei fire okkuperte områda som får militær unntakstilstand er Donetsk, Luhansk, Kherson og Zaporizjzja.
Ifølgje Russlands president Vladimir Putin kjem dei innsette leiarane til å få utvida fullmakter i dei okkuperte ukrainske fylka. Det er usikkert kva dette vil innebere.
Russiske styresmakter vil kontrollere folk som skal krysse grenser inn og ut av både dei annekterte ukrainske fylka og russiske grensefylke.
Tiltaka vil også gjelde dei sørlege russiske regionane Krasnodar, Belgorod, Bryansk, Voronezh, Kursk og Rostov.
I tillegg vil unntakstilstanden gjelde Krim og Sevastopol, som Russland annekterte frå Ukraina i 2014.
– Endrar ingenting for Ukraina
Ein rådgjevar for Ukrainas president Volodymyr Zelenskyj seier Russland med dette prøver å late som dei har eit lovleg grunnlag for å plyndre ukrainsk eigedom.
– Dette endrar ingenting for Ukraina. Vi held fram med frigjeringa av våre territorium, seier Mykhail Podolyak, ifølgje Reuters.
– Ukraina vil forsvare seg sjølv. Uansett kva fienden planlegg eller gjer, seier den ukrainske presidenten ifølgje Reuters.
Nye angrep mot Kyiv
Onsdag ettermiddag meldte nyheitsbyrået AFP at deira journalistar høyrde minst to kraftige smell frå eksplosjonar.
Ordføraren i Kyiv, Vitalij Klitsjko seier at dei skal ha skote ned fleire russiske rakettar over byen onsdag ettermiddag.
– Bli verande i tilfluktsrom, skriv han via sosiale medium.
Det er usikkert om kor eksplosjonane har treft eller om menneske er skada.
Har starta evakuering frå Kherson
Dei russisk-innsette styresmaktene i den okkuperte regionen Kherson i Ukraina varsla onsdag føremiddag at dei vil flytte vekk titusenvis av menneske nær frontlinja.
I tillegg vil dei innsette styresmaktene bli evakuerte, medan russiske soldatar skal bli att.
Årsaka skal vere at ukrainske styrkar skal vere nære.
