Fleire hundretusen palestinarar demonstrerer i gatene på Gazastripa og Vestbreidda. (Foto: AP/Scanpix)
Unge palestinarar demonstrerer i Gaza by. (Foto: AP/Scanpix)
Fleire hundre tusen palestinarar har innteke gatene på Gazastripa og på Vestbreidda etter drapet på sjeik Ahmed Yassin, den åndelege leiaren for Hamas. I Khan Yunis på Gazastripa vart ein 13 år gammal gut skoten og drepen, opplyser palestinske sjukehuskjelder. Fleire andre vart skadde i samanstøytane.
Opna eld
13-åringen vart skoten i hovudet då israelske soldatar opna eld frå eit utkikstårn i den israelsk busetjinga Ganei Tal, som ligg like i nærleiken.
Ein 22 år gammal palestinsk journalist vart treft av eit skot i magen medan han rapporterte frå ein demonstrasjon i flfyktningleiren Balata i utkanten av Nablus på Vestbreidda. Han arbeidde for radiostasjonen ved universitetet i Nablus.
Åtak med øks
Utanfor ein militærbase nær Tel Aviv hoppa ein palestinsk mann ut av ein bil, og gjekk til åtak på tre israelarar med ei øks. Ingen vart alvorleg skadd i angrepet, og den palestinske mannen blei arrestert, opplyser den israelske hæren.
Al Aqsa-brigadane har lovd å slå til mot israelske mål i løpet av kort tid etter drapet på sjeik Yassin. Hamas har sagt at dei skal drepe fleire hundre israelarar som hemn for likvideringa av Yassin.
Begge dei to gruppene har sagt at det no er full krig med Israel.
Internasjonal fordømming
Eit samla internasjonalt samfunn fordømmer drapet på sjeik Yassin. Det er sterke reaksjonar i Israel sine arabiske naboland, og fordømminga er unison også i dei fleste europeiske land. EU har gjort det klart at dette ikkje er akseptabel poltitikk.
Storbritannias utanriksminister Jack Straw seier at Israel har rett til å forsvare seg mot terror, men at drapet på Yassin er i strid med internasjonal lov. Han fordømmer attentatet på det sterkaste.
Egypts president Hosni Mubarak har gjort det klart at Egypt trekkjer seg frå feiringa som er planlagd i samband med 25-årsdagen for fredsavtalen med Israel i 1979, den såkalla Camp David-avtalen.
USA Ikkje varsla
Det kvite hus i Wahington nektar for at USA hadde gitt grønt lys for likvideringa av Yassin. Tryggingsrådgjevar Condolezza Rice avviste at Israel hadde varsla USA på førehand om drapet.
Fleire arabiske land har skulda USA for å ha gitt grønt lys for likvideringa av Hamas-leiaren.