Rundt 1500 palestinarar deltok i demonstrasjonen mot den israelske blokaden. Det vart kasta stein mot dei israelske soldatane, og dei svarte med å skyte gummikuler mot steinkastarane. Sjukehuskjelder opplyser at den 26 år gamle palestinaren vart skoten med stålammunisjon.
Statsminister Ariel Sharon seier at blokaden rundt Ramallah på Vestbreidda vart styrkt for å hindre sjølvmordsaksjonar mot israelske mål. Fleire av ministrane i den nye regjeringa er kritiske til styrkinga av blokaden rundt Ramallah.
Utanriksminister Shimon Peres var ein av ministrane som uttrykte seg sterkt kritisk til blokaden på israelsk radio, før Sharon-regjeringa sitt første regjeringsmøte i føremiddag. Peres sa at avgjerda om å styrke blokaden av Ramallah måtte gjerast om. Han fekk støtte frå fleire andre regjeringsmedlemer frå Arbeidarpartiet.
-