Den 21 år gamle mannen vart arrestert på Mallorca onsdag medan han fekk overlevert 140 kilo med sprengstoff som han hadde tinga.
Politiet skriv i ei pressemelding at han planla å sprenge ei bombe på universitetet på øya. Dei har gått gjennom dagbøkene til mannen, i tillegg til profilar på sosiale medium. Her, seier politiet, har dei funne bevis for at mannen planla å gå til åtak på universitetet.
I pressemeldinga vert det òg hevda at mannen beundra gjerningsmennene bak Columbine-massakre i USA. Dette skal ha kome fram i mannens personlege dagbok og skriverier på nett. Politiet trur dermed han hadde tenkt å imitere Columbine-massakren.
På mannens blogg skal han òg ha utvist eit ope hat mot samfunnet rundt seg, og særleg mot studentar. Politiet hevdar dei har kjent til mannen i over fem månader, og starta overvakinga av han etter at dei fyrste Columbine-referansane vart kjende.
Politiet seier òg at han gjekk til innkjøp av ingrediensar til å lage ei bombe etter at han fleire gonger hadde prøvd å kjøpe handvåpen, utan å få løyve til dette. Rett etter ingrediensane vart levert til mannen, vart han altså arrestert.
(The Associated Press, NTB)