Velasquez (57) var kjent som den viktigaste leigemordaren til den illgjetne narkotikabaronen Pablo Escobar, som på eit tidspunkt var ein av dei rikaste i verda. Alt takka vere ein ufatteleg brutalitet og rikeleg tilgang på kokain, som vart smugla til USA.
Escobar var leiar for det såkalla Medellin-kartellet, som hadde basen sin i den colombianske storbyen Medellin. Han vart skoten og drepen av colombiansk politi i 1993 under eit forsøk på å unngå å bli utlevert til USA.
23 år i fengsel
Drapsmaskinen Velasquez vart arrestert i Colombia året før. Han sona 23 år i fengsel før han vart sett fri i 2016. Han har fortalt at han personleg har gjennomført mellom 250 og 300 direkte drap, og at han har gitt ordre om ytterlegare 3000 drap på 1980- og 1990-talet.
Colombianske styresmakter tvilar på at talet er så høgt, ifølgje AFP.
Som fri mann starta han opp You Tube-kanalen «Repentant» (den angrande), som raskt fekk over ein million abonnentar.
– I dag ser eg på det som barbari. Men når du er midt i ein krig, så verkar det som ein rett ting å gjere, sa han i eit intervju med det colombianske nyheitsmagasinet Semana. Han vart arrestert igjen i 2018 for mistanke om utpressing. Sidan har han vore i styresmaktene si varetekt.
Starta som 18-åring
Han starta på den blodige yrkesvegen sin i Medellin-kartellet alt som 18-åring, og han vart raskt ein av dei Pablo Escobar kunne stole på. Dei brukte bilbomber, bortføringar og avrettingar i kampen mot motstandarar. Det kunne vere konkurrerande kartell, politikarar, journalistar og dommarar.
Jhon Jairo Velasquez døydde av kreft på eit sjukehus i Bogota torsdag.