Over 120 skadde i kraftig jordskjelv i Japan

Dei skadde er innbyggjarar i områda Fukushima, Miyagi, Ibaraki, Tochigi, Saitama, Chiba og Kanagawa, ifølgje nyheitsbyrået Kyodo. Skjelvet var og merkbart i regionen Kanto, som Tokyo er del av, melder den japanske kringkastaren NHK.

Ifølgje styresmaktene er to menneske i Fukushima og ein person i Saitama alvorleg skadde.

950.000 husstandar skal ha mista straumen, men mykje er reparert søndag morgon, opplyser Japan Times.

Det amerikanske jordskjelvsenteret USGS målte skjelvet til 7,1. Episenteret er på 58 kilometers djupne og ligg 72 kilometer frå småbyen Nami. Japanske styresmakter har seinare oppgradert skjelvet til 7,3.

Undersøker Fukushima-verket

Det var ikkje fare for tsunami etter skjelvet, og det kom heller inga meldingar om jordskjelv-skader på kjernekraftverket i Fukushima. Selskapet som driv kjernekraftverket Fukushima Daiichi, sa i ei Twitter-melding laurdag at dei undersøker forholda ved verket.

Kort tid seinare melde nyheitsbyrået Kyodo at det verken var meld om skader her eller ved andre atomkraftverk som no er stengde i regionen.

• - Fukushima-katastrofe var eit varsel om at atomkraft aldri blir heilt trygt

Jordskjelv kom like etter klokka 23 lokal tid og skaka bygningar i hovudstaden Tokyo. Skjelvet ramma og mellom andre provinsen Myagi. Rundt 950.000 husstandar har mist straumen i den jordskjelvramma regionen, opplyser styresmaktene.

Det var fleire etterskjelv, deriblant eitt som er målt til 4,7.

I mars 2011 blei Fukushima og andre deler av det nordaustlege Japan ramma av eit jordskjelv med styrke 9. Tsunamien som følgde etter kravde over 18.000 menneskeliv og førte til nedsmelting av tre reaktorkjernar i atomkraftverket Fukushima Daiichi.