Dei russisk-vennlege opprørarane i Aust-Ukraina nektar observatørane frå OSSE å komme inn i Debaltseve. Det seier leiaren for OSSE-observatørane i området, Ertugrul Apakan.
Ein av opprørsleiarane, Eduard Basurin, seier til nyheitsbyrået Reuters at våpenkvila ikkje gjeld Debaltseve. – Sjølvsagt kan vi skyte mot Debaltseve. Det er vårt territorium, sa Basurin til nyheitsbyrået Reuters søndag.
Kampar ved Debaltseve
Det er i Debaltseve kampane har vore mest omfattande den siste tida. Og det har vore fleire angrep ved byen etter at våpenkvila tok til å gjelde ved midnatt lokal tid.
I alt har det vore rundt 60 angrep mot regjeringsstyrkane sidan våpenkvila tok til å gjelde, dei fleste ved Debaltseve, sa ein talsmann for det ukrainske forsvaret søndag ettermiddag.
- Sjå også:
- Sjå også:
Opprørarane har omringa dei ukrainske styrkane i Debaltseve, som er eit viktig jernbaneknutepunkt. Opprørsleiar Aleksandr Zakhartsjenko sa laurdag at det blir å rekne som aggresjon dersom soldatane prøver å bryte seg ut etter at våpenkvila har teke til å gjelde.
– Alle slike forsøk vil bli stansa av oss, sa Zakhartsjenko.
Våpenkvila respektert dei fleste stader
OSSE-leiar Ertugrul Apakan seier søndag at våpenkvila stort sett blir respektert, bortsett frå i Debaltseve og Luhansk. Dette er byar der opprørarane, som kjempar mot dei ukrainske regjeringsstyrkane, har eit sterkt fotfeste.
Det er i samsvar med meldingane frå det ukrainske forsvaret. Ein talsmann seier at artilleriangrepa frå russiskvennlege opprørarar er sporadiske og avgrensa til enkelte område.
Ved midnatt natt til søndag gav president Petro Porosjenko ordre til dei væpna styrkane om å stanse skytinga. Våpenkvila var dermed eit faktum.
Fredsavtalen blei forhandla fram torsdag av presidenten i Ukraina, Petro Porosjenko, den russiske presidenten, Vladimir Putin, den tyske forbundskanslaren, Angela Merkel og residenten i Frankrike, François Hollande.
Talsmann for den russiske regjeringa, Dmitry Peskov, sa søndag at våpenkvila må bli respektert utan unnatak.