Dei innsette i Ford Open Prison i Sussex sette fyr på sine eigne celler, øydela møblar og knuste vindauge då opprøret starta like etter midnatt natt til første nyttårsdag.
Fengselsvaktene var nøydde å forlate fengselet då opprøret starta. Opprørspoliti med fullt utstyr vart henta inn for å ta hand om dei innsette.
To vakter - 200 innsette
Ifølgje The Telegraph kan det ha vore så få som to fengelsvakter og fire andre tilsette på jobb i går kveld. I fengselet er det 200 innsette.
Ifølgje Mark Freeman, representant for fengselsvaktene, vart det funne store mengder alkohol inne på fengselsområdet. Han seier også at opprøret starta då nokre innsette nekta å bli tekne promilletest av.
Den store mengda med alkohol som blir smugla inn i fengselet var rapportert allereie i 2008, og ifølgje Freeman var det berre spørsmål om tid før noko slikt ville skje.
– Fengselsvaktene har jaga dei innsette i eit par dagar, som i ein «Benny Hill»-sketsj, for å få dei til å ta promilletestar, seier Freeman til The Telegraph.
Fleire brannar
Rundt midnatt starta 40 av dei innsette å knuse vindauge og løyse ut brannalarmar. Det vart berre verre, og då det starta å brenne fleire stader, bestemte fengselsvaktene seg for å flykte.
Både politi og brannvesen vart kalt inn, men bråket heldt fram. Minst to andre bygningar inne på området begynte å brenne. Taket på bygningane bula ut på grunn av flammane.
Tidleg i dag kom fengselsvakter med opprørsutrusting og vakthundar for å prøve å roe ned opprøret.
140 ekstra vakter
I ettermiddag er større styrkar på plass for å få kontroll.
– Vi kan stadfeste at 140 ekstra vakter har kome til Ford for å hjelpe dei lokale vaktene med å få kontroll i fengselet, seier ein talsmann ved fengselet til The Telegraph.
Han understrekar at dette ikkje betyr at situasjonen er på veg til å bli meir dramatisk, men at dette er stadard prosedyre.
– Ein av dei to bygningane var under kontroll klokka 10.40 (britisk tid) og det er ingenting som tydar på at bråket skal ta seg opp i den andre, seier han.
Brannvesenet har sløkt brannane og reist frå området.