Opposisjonsleiar i dekning – kraftige protestar i Kviterussland

Vitne fortel om kaotiske scenar i hovudstaden Minsk med demonstrantar som ropte, bilhorn og sirener. Også i andre byar i Kviterussland var det protestert mot valresultatet.

Ein video viser politiet som skyt sjokkgranatar mot demonstrantane for å spreie dei.

Ifølgje vitne samla fleire tusen demonstrantar og om lag tusen opprørspoliti seg i sentrale delar av hovudstaden Minsk.

Medium knytt til opposisjonen, blant dei tut.by og Nasha Niva, skriv at det blir brukt vasskanonar og at ein politibil skal ha køyrt inn i folkemengda. I natt var både nettavisene nede. Internett er nede og NRK har høyrt rapportar om at gatelys er sløkte i deler av byen.

Det kjem meldingar om skadde i sosiale medium og internasjonale nyheitsbyrå. Bilde i sosiale medium viser demonstrantar med hovudskadar, men innanriksdepartementet nektar likevel for at nokon er skadde. Det er ei menneskerettsgruppe som melder at ein person er død i samanstøytar med politiet, skriv Reuters.

Ber om at valdsbruken tek slutt

Medan demonstrasjonane gjekk føre seg i mellom anna Minsk og Brest, bad opposisjonsleiar Svetlana Tikhanovskaja om ro og om at tryggingsstyrkane avstår frå å bruke vald.

– Eg vil minne politiet og militære styrkar om at dei er del av vår offentlegheit, seier ho ifølgje valkampapparatet sitt.

– Eg veit at folket i Kviterussland vil vakne i morgon til eit nytt land, seier ho vidare.

Styresmaktene i Kviterussland seier på si side at demonstrasjonane er under kontroll.

– Politiet har på kontroll på situasjonen med dei ulovlege massesamlingane, melder det statlege nyheitsbyrået Belta, som siterer innanriksdepartementet.

Utfordrar har gått i dekning

Mange er òg arresterte i opptøyane. Tikhanovskaja gjekk i dekning etter at fleire av valmedarbeidarane hennar vart arresterte.

Ein av rådgivarane hennar har flykta til Moskva i frykt for si eiga tryggleik, melder CNN. Alt før valet sende Tikhanovskaja barna sine til Moskva i frykt for kva som kunne hende dei.

Den 37 år gamle engelsklæraren kom for alvor inn i politikken då ektemannen hennar, den populære bloggaren Sergej Tikhanovskij, vart henta av Lukasjenko sine agentar og fengsla.

Nekta å godta tapet

Tikhanovskaja utfordra Kviterusslands mangeårige leiar Aleksandr Lukasjenko i presidentvalet. Valdagsmålinga frå det statlege nyheitsbyrået BelTA gir den sitjande presidenten rundt 80 prosent av stemmene og Tikhanovskaja berre 7 prosent.

Dermed kan det sjå ut til at Lukasjenko kan ta fatt på den sjette perioden sin som statsleiar.

• Lukasjenko feier motstander av banen

Men Tikhanovskaja nektar å godta valnederlaget. Ifølgje ein medarbeidar seier ho at ho er overtydd om at fleirtalet av kviterussarane stør henne.

Valkommisjonen i landet har enno ikkje offentleggjort det offisielle valresultatet.