Obama: – Vi skal knekke denne barbariske rørsla

– Vårt mål er å knekke og til slutt øydelegge denne barbariske terror-rørsla, sa Obama i sin tale under G-20 møtet i Tyrkia i dag.

– Vi har ein brei strategi for å få dette til. Militærmakt, etterretning og økonomisk press. Vi har alltid skjønt at dette ville bli eit langvarig felttog, sa Obama.

Kampen mot IS har vore eit hovudtema under toppmøtet. Obama og Putin er observert i intense samtalar på sidelinja.

TV-kanalen Russia Today hevdar til og med at nokon prøvde å spionere på dei to leiarane.

Både USA og Russland bomber no IS i Syria.

Og Paris-terroren har gjort sitt til at det hastar med å legge til side usemje, for å betre samarbeidet og koordineringa.

Problemet er berre at Russland vil behalde Assad ved makta, medan USA ser for seg ei ny folkevald regjering som kan samle folket og få slutt på borgarkrigen.

– Assad har ingen framtidig rolle

Obama gjentok i sin tale i dag at Assad ikkje har noko rolle i eit framtidig Syria.

Men den britiske statsministeren kunne røpe at dei to statsleiarane forhandla om eit kompromiss.

– Partane står framleis langt frå kvarandre, sa David Cameron kryptisk til avisa «The Guardian.»

Obama: – Trappar opp bombekampanjen

Obama sa at USA saman med koalisjonspartnarane no trappar opp bombekampanjen mot IS.

Og saman med opposisjonsstyrkar, ynskjer USA å strype forsyningslinjene til islamistane.

Obama trakk fram sigeren i den irakiske byen Sinjar som eit vellukka eksempel på denne taktikken.

• LES OGSÅ: Kutta forsyningslinjene til IS

Bakkestyrkar vil vere eit «feilgrep»

Obama sa han ikkje ville angripe IS med bakkestyrkar. Han hadde fått råd frå forsvaret om at dette ville vere eit «feilgrep».

For han vil ikkje hamne i ein situasjon der USA blir tvinga til å okkupere store delar av Syria, utan at det finst nokon utveg.

– Strategien vår må vere berekraftig, sa Obama.