Hansen fortel ho akkurat lagt seg, da ho kjende vibrasjonane. Av erfaring visste ho dette var eit jordskjelv. Eit vanleg fenomen under oppveksten i New Zealand.
– Så eg stod opp med ein gang og stod mellom dørkarmen, som er den sikraste staden i huset.
Hansen har dei siste 40 åra budd i Noreg, og er no pensjonist. Ho er på besøk hjå vener og slekt i Marton, som ligg rundt 16 mil nord for Wellington, på den nordlege øya.
– Det var det lengste skjelvet eg har opplevd nokosinne, fortel Hansen til NRK.
Sjekkar naudprovianten
Ho driv no og laddar mobiltelefonen og sjekkar at «survival» utstyret er i orden med reint drikkevatn og at alle mobiltelefonar blir ladda.
Det kan kome fleire skjelv i løpet av natta.
– Alle hus må ha «survival kit» med lys, mat og vann. I tillegg har vi eit aktivt sivilforsvar som heilt sikkert arbeider hardt akkurat no, fortel ho til NRK.
Mange har nytta sosiale medium for å vise fram skadar på hus og heim.
Jernvarehandelen sel eigne naudskrin for jordskjelv
Jordskjelv er vanleg på New Zealand, så innbyggarane blir oppmoda til å lage seg naudlager og vedlikehalde desse.
På heimesidene til sivilforsvaret i New Zealand kan ein få råd og tips om kva eit «survival kit» bør innehalde, og kva ein treng for dei ulike naturkatastrofane som kan råke New Zealand.
Det finst også eigne firma som kan hjelpe til med å tilpasse kva ein treng å ha i heimen i tilfelle jordskjelv.
Men sjølv om det skjelv nå fleire stadar over New Zealand, er ikkje Margaret Hansen veldig uroa. Ho vedgår det vil ikkje bli mykje søvn, men huset ho bur i er solid, fortel ho til NRK.