– Jordskjelvet motiverte oss til å jobbe saman, seier Nepals informasjonsminister Minendra Rijal, til nyheitsbyrået AFP, og legg til at avtalen som no er signert er eit stort gjennombrot, og at det no finst ein vilje i landet til å få ting gjort.
Betent grensespørsmål
Dei nepalske politikarane har blitt einige om eit utkast til nye nasjonale vedtekter som skulle på plass etter at fleire tiår med maoist-opprør.
Opprøret kosta rundt 16.000 menneskeliv og varte frå 1996 til 2006. Sidan freden kom har det blitt jobba med eit utkast til ein avtale om ny grunnlov, men det har vist seg å vere vanskeleg å bli einige – fram til no.
- LES OGSÅ:
For no kan det sjå ut til at det er funne ei løysing på det mest betente spørsmålet, nemleg inndelinga av provinsar i Nepal.
Åtte nye provinsar
Maoistpartiet har hatt eit ønske om at dei nye provinsane skal bli delte inn på ein måte som favoriserer marginaliserte lokalsamfunn, medan andre parti har meint at det vil splitte og truge det nasjonale samarbeidet.
- LES YTRING:
Den nye avtalen fører til at landet no vil bli delt opp i åtte nye provinsar. Men det er framleis ikkje heilt klart kor provinsgrensene kjem til å gå.
Avtalen må vel å merke bli godkjent av to tredjedelar av det nepalske parlamentet før den er ein realitet, men det er venta at prosessen vil vere i mål i juli.
– Endra seg etter det første skjelvet
I Nepal er mange letta over at avtalen er på plass, og det er jordskjelvkatastrofen som får æra for den plutselege politiske harmonien.
– Alle var metta og leie av dei politiske partia, og folk trudde aldri at grunnlova ville komme fordi dei aldri klarte å bli einige om noko som helst, seier avisredaktøren Guna Raj Luitel til nyheitsbyrået AFP.
- LES OGSÅ:
– Men etter det første jordskjelvet, så endra ting seg. Fleire parti såg ut til å forstå at dei måtte jobbe saman for å bygge opp att landet, seier han.
Jordskjelvet tok over 8.700 menneskeliv, og øydela mykje av infrastrukturen i Nepal. Men jordskjelvet klarte altså å endre på Nepals landegrenser også, og samstundes skape ro for Nepals politikk.