Det er styresmaktene i Kiev som seier at det er observert ei kolonne med 32 russiske stridsvogner. Opplysingane er førebels ikkje stadfesta av andre kjelder.
– Ser nøye på opplysingane
Ein offiser i Nato, som ønskjer å vere anonym, seier til nyheitsbyrået Reuters, at dei no sjekkar rapportane om russiske stridsvogner i Aust-Ukraina.
– Me kjenner til rapportane om russiske troppar og stridsvogner som kryssa grensa mellom Ukraina og Russland, og ser nøyare på desse opplysingane no, seier offiseren.
- LES OGSÅ:
- LES OGSÅ:
Han seier også at Nato den siste tida har observert ei auke i russiske troppar og utstyr nær den austlege grensa av Ukraina.
– Om denne grensekryssinga inn i Ukraina vert stadfesta, så vil det vere bevis på russisk aggresjon og direkte involvering i destabiliseringa av Ukraina, seier offiseren.
Ukrainas president, Petro Porosjenko, tok opp påstandane om russiske stridsvogner med Tysklands forbundskanslar, Angela Merkel, i dag.
– Kolonnen er eit brutalt brot på folkeretten og gjer det mykje vanskelegare å få til ei fredeleg løysning på konflikten, sa Porosjenko.
Skuldar på kvarandre
Russland har lenge blitt skulda for å vere direkte blanda inn i den ukrainske borgarkrigen mellom prorussiske separatistar og ukrainske styresmakter. Partane skal eigentleg ha inngått ein våpenkvileavtale, men denne avtalen har blitt broten fleire gonger dei siste månadane.
- LES YTRING:
– Russland er framleis plikta til å følgje den to månader gamle avtalen, seier ein russisk talsmann til Reuters.
Det har vore fleire angrep i Aust-Ukraina dei siste dagane, med minst fem drepne og 31 skadde, seier det ukrainske militæret. Mellom anna skal to ungdommar ha blitt drepne i eit angrep i Donetsk.
Men skuldingane går begge vegar, for ukrainarane må tole skuldingar frå opprørarane om å bryte våpenkvileavtalen.
