NRK Meny
Normal

Mugabe trekte seg ikkje – full forvirring i Zimbabwe

HARARE (NRK): Robert Mugabe trekte seg ikkje i den fjernsynssende talen sin i kveld. Det er uklart kva som skjer vidare i landet.

Mugabe talte til folket.

Det er full forvirring i Zimbabwe etter talen til Robert Mugabe. Alle trudde han ville trekkje seg, men det gjorde han ikkje.

Foto: Philimon Bulawayo / Reuters

Den 93 år gamle presidenten heldt ein tale til nasjonen på den statlege fjernsynskanalen i kveld. Alle hadde rekna med at han ville trekkje seg, men det skjedde ikkje. I talen sa han blant anna at hæren si inngriping sist veke ikkje var retta mot presidenten eller i strid med grunnlova. Han sa at dei militære heile tida har behandla han med respekt.

Han sa også at han skal leie den komande partikongressen i regjeringspartiet ZANU-PF i desember. Han sa ikkje noko om at han kjem til å trekkje seg der heller. Folk i Zimbabwe er i sjokk. Ingen veit kva som kan kome til å skje i landet dei komande dagane.

VIDEO: Boldwill Hungwe er sjokkert.

– Nasjonen må stå samla

Chris Mutsvangwa.

Den mektige leiaren for krigsveteranane i Zimbabwe, Chris Mutsvangwa, varslar nye demonstrasjonar mot Mugabe.

Foto: AP

Mugabe sa at det er viktig at nasjonen står samla når framtida skal stakast ut, og at ånda frå frigjeringskampen framleis skal leve vidare i landet. Mugabe vedgjekk at landet har store problem, og at det er årsaka til at så mange har teke til orde for endring.

Det statlege fjernsynet stadfesta i kveld at dei øvste leiarane i hæren i kveld hadde eit fleire timar langt møte med Mugabe.

Kjelder rundt forhandlingane mellom hæren og Mugabe, der også den zimbabwiske kyrkja var med, sa tidlegare i kveld at den aldrande presidenten hadde gått med på å trekkje seg. I talen sa han ingenting om det. Han sat midt i ei gruppe med offiserar då han heldt talen sin.

Opposisjonsleiaren Morgan Tsvangirai seier han er forbløffa over at Mugabe ikkje varsla avgangen sin.

– Riksrett og demonstrasjonar

Boldwill Hungwe

Boldwill Hungwe er svært skuffa over talen til president Robert Mugabe.

Foto: NRK

Den mektige leiaren for krigsveteranane i Zimbabwe, Chris Mutsvangwa, sa rett etter talen at arbeidet for å få Mugabe stilt for riksrett, vil halde fram. Han varslar nye demonstrasjonar mot den upopulære presidenten i Harare førstkomande onsdag.

Den zimbabwiske journalisten Boldwill Hungwe sa til NRK etter talen at han er svært skuffa og sint.

– Kva vil skje no? Blir det meir valdsbruk? Er vi tilbake ved start?, seier han. Han undrar seg om hæren har skifta side. Under demonstrasjonane i Harare dei siste dagane har folk jubla saman med soldatar i gatene.

Han meiner at riksrett no er det einaste håpet for å bli kvitt den 93 år gamle presidenten.

– Vi kjem ikkje til å få sove i natt. Hæren skuldar oss verkeleg ei forklaring på kva som eigentleg har skjedd, seier han. Han trur ikkje folk vil vente heilt til onsdag med å ta til gatene og protestere.

VIDEO: Tidlegare Afrika-korrespondent Dag Bredvei om talen til Mugabe.

Hæren tok makta

Hæren tok makta i Zimbabwe 15. november og presidenten vart sett i ein slags husarrest. Robert Mugabe har hittil nekta å trekkje seg. Seinast i går sa ein slektning til Reuters at han heller ville døy enn å trekkje seg.

Tidlegare i dag avgjorde regjeringspartiet ZANU-PF å fjerne Mugabe som leiar i partiet, og også kona hans vart avsett som leiar for kvinneorganisasjonen. Emmerson Mnangagwa, Mugabes sterkaste politiske rival, blir ny leiar for ZANU-PF.

Partiet gav Mugabe ein frist på 24 timar til å trekkje seg. Alternativet er riksrett.

I går var det store demonstrasjonar i Harare, der kravet om presidenten sin avgang var unisont. Mange meiner at 93 år gamle Mugabe, det eldste statsoverhovudet verda, har  øydelagt landet.

Zimbabwes president Robert Mugabe.

Alle trudde at Robert Mugabe hadde gått med på å trekkje seg, men det gjorde han ikkje.

Foto: PHILIMON BULAWAYO
Laster innhold, vennligst vent..
Laster innhold, vennligst vent..

SISTE NYTT

Siste nytt