Hopp til innhold

Minst 30 drepne då demonstrantar storma regjeringspalasset i Bagdad

I Irak er minst 30 demonstrantar drepne og 700 såra, ifølge helsepersonell. Demonstrantane storma regjeringspalasset etter at sjialeiaren Moqtada al-Sadr sa at han trekkjer seg frå all politikk.

Sinte demonstrantar storma regjeringspalasset i Bagdad Irak.

STORMA: Tilhengarar av de irakiske sjialeiaren Moqtada al-Sadr protesterer utanfor og inne i regjeringa sitt hovudkvarter som ligg inne i den såkalla grøne sona i Bagdad.

Foto: AHMAD AL-RUBAYE / AFP

– Eg kunngjer med dette den endelege tilbaketrekkinga mi, skreiv sjialeiaren Moqtada al-Sadr måndag formiddag på Twitter.

Han vil ikkje lenger blande seg i politiske saker, legg han til.

Kunngjeringa vart raskt møtt med uro frå Sadrs støttespelarar, som storma regjeringspalasset i hovudstaden Bagdad.

Palasset ligg inne i den godt sikra grøne sona med regjeringsbygningar. Her er også kontoret til statsministeren.

Demonstranter stormer regjeringspalasset i Bagdad Irak. Her svømmer dei i bassenget

Demonstrantane kom seg inn i regjeringspalasset, og her badar dei i bassenget.

Foto: AHMAD AL-RUBAYE / AFP

Tysdag er situasjonen i Bagdad spent etter ei natt med skyting og eksplosjonar, ifølgje Al Jazeera. Fleire granatar skal ha treft høgsikkerheitssona.

Grand Marji'a, det store sjia-religiøse leiarskapet, er blitt oppfordra til å gripe inn i konflikten.

I eit forsøk på å få kontroll over situasjonen, innførte hæren i Irak eit portforbod i heile landet. Den starta klokka 19.00 lokal tid måndag, melder nyheitsbyrået Reuters.

Tysdag kom Moqtada al-Sadr med ei innstendig oppfordring til støttespelarane om å trekkje seg tilbake.

Det er ikkje klart kven som står bak angrepa.

Fleire sinte demonstrantar stormar regjeringspalasset i Bagdad.

Tilhengjarar av den al-Sadr reagerer på røyk utanfor regjeringa sitt hovudkvarter i hovudstaden Bagdad si grøne sone.

Foto: AHMAD AL-RUBAYE / AFP

Kven er Sadr?

– Sadr er ein religiøs leiar frå ein framståande sjiamuslimsk familie av tidlegare religiøse leiarar som har hatt stor respekt i Irak, seier forskar ved Norsk utanrikspolitisk institutt (NUPI) Kjetil Selvik.

Sadr har ikkje hatt nokon sentrale politiske posisjonar, men han har mykje politisk innflytelse i kulissane, seier Selvik.

Det Sadr eigentleg seier når han skal trekke seg frå politiske saker, er at han vil reindyrke sitt omdømme som religiøs leiar i staden for, seier Selvik og legg til:

– Religiøse leiarar er gjerne meir populære i Irak.

Sjialeiaren Moqtada al-Sadr iført svart turban og grått skjegg.

Sjialeiaren Moqtada al-Sadr meldte i dag at han trekkjer seg frå all politikk. Her er held han ei tale i Najaf i juni 2022.

Foto: QASSEM AL-KAABI / AFP

Selvik forklarar at Sadr har ein stor tilhengarskare som er kjend for å gå til gatene.

– Mykje av makta til Sadr har historisk vore at han har ein sterk emne til å mobilisere protest.

Den brukar han no for å få det som han vil, elles blir det kaotiske forhold i Irak, forklarar Selvik.

Ti månadar utan nasjonalforsamling

Vel ti månader etter valet av ny nasjonalforsamling i Irak har dei folkevalde framleis ikkje greidd å bli samde om ny regjering, statsminister eller president.

Den største blokka i nasjonalforsamlinga vart kontrollert av Sadr, då han hadde 73 av dei 329 representantane.

Saman med andre parti, har han danna ein koalisjon som har 155 representantar, men det var ikkje nok til å danne regjering.

Tilhengarar av den sjialeiaren Moqtada al-Sadr i gatene i Bagdad.
Foto: AHMAD AL-RUBAYE / AFP

Sadr-koalisjonen er på kant med den andre sida av sjiamuslimsk politikk i Irak, det såkalla Koordinasjons-rammeverket.

Dei har 130 representantar i nasjonalforsamlinga og manglar også det nødvendige fleirtalet.

Krev nyval

Etter ei lang periode med politisk krise i landet, bestemde Sadr seg i juni for å trekkje seg sjølv og alle gruppemedlemmer frå nasjonalforsamlinga.

Då Koordinasjons-rammeverket prøvde å danne regjering, storma tilhengjarane til Sadr nasjonalforsamlinga.

Fleire hundre tilhengjarar har sidan okkupert plassen utanfor nasjonalforsamlinga.

Tilhengere av den irakiske populistlederen Moqtada al-Sadr protesterer inne i den grønne sonen, i Bagdad.

Tilhengarar av de irakiske sjialeiaren Moqtada al-Sadr protesterer inne i den såkalla grøne sona i Bagdad.

Foto: THAIER AL-SUDANI / Reuters

Tidlegare i månaden tok Sadr til orde for «ein demokratisk, revolusjonær og fredeleg prosess», oppløysing av nasjonalforsamlinga og nyval.

Han understreka også at toget var gått for ei forhandlingsløysing.

Iraks fungerande statsminister Mustafa al-Kadhemi og president Barham Saleh nektar likevel å gi opp håpet om ei forhandlingsløysing og har teke til orde for «nasjonal dialog».

SISTE NYTT

Siste nytt

BBC-reporter Ed Lawrence arrestert under demonstrasjoner i Shanghai

FN ber Kina respektere retten til fredelige protester

FN oppfordrer Kina til å respektere retten til fredelige protester etter demonstrasjonene i landet de siste dagene. Søndag ble en BBC-journalist pågrepet av kinesisk politi under demonstrasjoner i Shanghai.