Milliardæren på veg til ISS

Dette er den 60 år gamle milliardæren sin andre tur til den internasjonale romstasjonen ISS.

Dermed blir han den første romturisten som har delteke på to romferder.

60 mill. dollar

Han har betalt 60 millionar dollar, rundt 420 millionar kroner, for å få delta på romferda saman med den amerikanske NASA-astronauten Michael Barratt og den russiske kosmonauten Gennadij Padalka.

Dei to sistenemnde skal innn som nytt mannskap på ISS.

Charles Simonyi har tent mesteparten av pengane sine på å utvikle programvare hos datagiganten Microsoft i USA.

Rakettoppskytinga skjedde frå Baikonur Cosmodrome langt inne på dei kasakhstanske steppene.

Med seg til Kasakhstan har romturisten den 28 år gamle svenske kona si, Lisa Persdotter, og ei gruppe vener. Dei helste dei tre romfararane med jubel og lukke til-rop då deireiste ut til oppskytingsstaden i dag tidleg.

Siste romferda

Den eksentriske romturisten svarte med slengkyss då han kom ut av hotellet kledd i fotsid pelsfrakk mot den strenge kulden. Han har sagt at dette blir den siste romferda hans, fordi han i framtida vil bruke tida saman med den unge svenske kona si.

Sojuz 18S skal etter planen vere framme på ISS i løpet av laurdag. Simonyi kjem tilbake til jorda 7. april saman med den amerikanske astronauten Michael Fincke og den russiske flyingeniøren Jurij Lonsjakov, som er ferdige med sin periode om bord i den internasjonale romstasjonen.