Merkel-alliert blir ny partileiar

I går opna landsmøtet til partiet CDU i Berlin medan hovudstaden er i «lockdown» og smittetala har nyleg passert 2 million i Tyskland.

Koronapandemien har ført til at landsmøtet har blitt utsett fleire gangar, etter at førre leiar, Annegret Kramp-Karrenbauer, blei pressa til å gå av i februar.

• LES: Handtrykket som sette fyr på Tyskland

Delegatane deltok denne helga over internett, og kandidatane blei vist fram i ein stor sal utan publikum.

Armin Laschet, som er regjeringssjef i delstaten Nordrhein-Westfalen, kjempa til slutt mot kandidaten til partiet sin konservative fløy, forretningsadvokaten Friedrich Merz.

Laschet vann til slutt andre runde av voteringa med 521 mot 466 stemmer.

Sentrumspolitikk

Både Laschet og Merz har fått kritikk for at dei er litt kjedelege middelaldrande menn, som ikkje vil vere i stand til å vinne eit nasjonalt val.

– Eg er ikkje nokon stor underhaldar, men eg er Armin Laschet, og det kan du stole på, var den nye partileiaren sin kommentar på denne kritikken i dag.

Laschet er ein trufast alliert av Merkel og lovar å halde fram sentrumspolitikken hennar. Han har også understreka at han har politisk erfaring som regjeringssjef for Tysklands største delstat Nordrhein-Westfalen.

– Vi vil berre vinne om vi klarar å halde sentrumspolitikken sterk, var bodskapen til Laschet.

Mange spør seg likevel om Laschet har det formatet som skal til for å bli ny regjeringssjef i Tyskland.

Angela Merkel er framleis den mest populære politikaren i landet, men ho gir seg i haust etter 16 år som kanslar.

Merkel blir rekna som den mektigaste politikaren i Europa, og ein statsleiar som bidreg med klokskap og stabilitet når det stormar på den internasjonale arenaen.

Tomrom etter Merkel

26. september er det val på ny nasjonalforsamling, og CDU treng ein kandidat som kan ta over arven etter Merkel.

Difor blir det spekulert i om den populære regjeringssjefen i delstaten Bayern, Markus Söder på eit tidspunkt vil bli lansert som kanslerkandidat.

Politikaren frå søsterpartiet CSU har vist handlekraft under koronaepidemien, og blitt ein populær figur i heile Tyskland.

Andre ser mot helseminister Jens Spahn, som også har blitt veldig profilert under koronakrisa. Men han har sagt at han vil vere lojal mot Laschet som leiar.