55 år gamle Liu Jie, som vart pågripen midt i oktober, vart funnen skuldig i å ha «forstyrra det sosiale systemet» og er dømd til såkalla «omskulering gjennom arbeid».
Det opplyser menneskerettsorganisasjonen China Human Rights Defenders.
Ville ha garden tilbake
Liu byrja å engasjera seg etter at styremaktene i Heilongjiang-provinsen tok frå henne garden der ho dreiv mjølkeproduksjon.
Etter å ha tapt kampen mot dei lokale styremaktene, samla 55-åringen støtte hjå likesinna og reiste til Beijing med tusenvis av underskrifter i bagasjen.
Samstundes anklaga ho styremaktene i heimprovinsen for korrupsjon. Det resulterte i at ho vart pågripen.
– Liu gav uttrykk for synet sitt og organiserte medborgarar for å klaga til styremaktene på fredeleg vis, seier China Human Rights Defenders.