NRK Meny
Normal

Måtte fjerne prest frå homogravferd

Politiet i Uganda måtte fjerne ein prest frå gravferda til homofile David Kato, fordi han sa rett ut til dei sørgjande at homoseksualitet er syndig.

Gravferd for homofil i Uganda

Mange var samla for å ta farvel med homofile David Kato.

Foto: MARC HOFER / Afp

Gravferd for homofil i Uganda

Dei som hadde møtt fram for å ta farvel, fekk høyre presten tale mot homofili.

Foto: Michele Sibiloni / Ap
Rolling Stone

Avisa Rolling Stone trykte namn, bilete og adressa til homofile David Kato.

Foto: Stringer / Ap

Fleire hundre menneske hadde møtt opp for å følgje David Kato til grava, etter at han vart drepen onsdag .

Han skulle gravleggjast utanfor familieheimen i Nakawala, om lag 40 kilometer frå hovudstaden Kampala.

Mange frå det homofile miljøet hadde møtt opp, og fleire av dei hadde på seg t-skjorter med bilete av Kato og påskrifta «La luta continua», som betyr «kampen held fram».

Talte mot homofili

Men midt under gravferda starta presten Thomas Musoke å dømme dei homofile, skriv BBC.

– De må vende om. Sjølv dyra veit skilnaden på ein mann og ei kvinne, sa han

Han rakk også å åtvare om at homofile ville få same lagnaden som innbyggjarane i Sodoma og Gomorra, dei bibelske byane som vart øydelagde av Gud, før han vart stansa av folk som storma til.

Presten vart så teken hand om av politiet, og ein prest som tidlegare er lyst i bann for å oppfordre folk til å respektere rettane til homofile, tok så over seremonien.

Bilete i avisa

I fjor saksøkte mannen avisa Rolling Stone i Uganda, etter at dei presenterte han som homofil . Saman med fleire andre namngitte menn, var han avbilda under tittelen «Heng dei!»

Homoseksualitet er forbode i Uganda, og kan bli straffa med 14 år i fengsel. Ein minister i landet har i tillegg ønskt å innføre dødsstraff i nokre saker .

Kato skal ha fått fleire drapstruslar etter at saka stod på trykk. I tillegg til å publisere fullt namn og bilete, skreiv avisa adressa der mannen budde.

Leiinga i avisa har nekta for at det er samanheng mellom deira sak og at Kato vart drepen.

Plakat av David Kato

Ein ny prest måtte ta over seremonien etter at han som starta vart bortvist.

Foto: MARC HOFER / Afp

Trur ikkje på homo-motiv

Augevitne har sagt til BBC at dei såg ein mann gå inn i huset til Kato, og slo han ihel før han stakk frå staden. Den siste tida har det vore fleire liknande drap i området.

Politiet har arrestert ein person i samband med drapet. Hovudmistenkte er framleis på rømmen. Politiet trur motivet for drapet var eit tjuveri.

– Legninga til Kato har ikkje kome fram som eit tema i etterforskinga, seier polititalsperson Judith Nabakooba til Reuters.

Utanriksminister i USA, Hillary Clinton krev at myndigheitene i Uganda etterforskar drapet og stiller dei skuldige for retten.

FN ber om at folk som blir forfølgde for legninga si i Uganda, må få flyktningestatus i andre land.

Laster innhold, vennligst vent..
Laster innhold, vennligst vent..

SISTE NYTT

Siste nytt