Feilen vart retta etter rundt ein halvtime, men byen slit med etterverknadene utover kvelden.
Talskvinne for det russiske krisedepartementet, Irina Andrianova, seier til fjernsynsstasjonen NTV at det var ein feil ved ein transformatorstasjon, og at denne feilen har spredd seg til ein annan. Ho seier at fire bydelar var ramma, blant anna det historiske Nevsky-området.
Nyheitsbyrået Interfax melder at straumbrotet skuldast «feil på utstyr».
Lyset gjekk i heile hovudgate Nevsky Prospekt, ei av dei lengste bygatene i verda. Elektriske bussar stansa midt i gata, og trafikklysa verkar ikkje.
Straumbrotet har ført til kaos på metroen, og fleire stasjonar måtte stengje. Andre har store forseinkingar. Den internasjonale flyplassen Pulkovo er ikkje ramma, melder AFP.
Dei ramma områda var også utan vassforsyning, fordi dei aller fleste vasspumpene blir drivne med elektrisitet.
Det bur 4,5 millionar menneske i St. Petersburg.
Det statlege russiske fjernsynet melder at straumen gjekk kl. 18.40 lokal tid, klokka 16.40 norsk tid.