NRK Meny
Normal

Massegravferd i Kongo

Fleire tusen menneske deltok søndag i ei massegravferd for ofra for eksplosjonen i Kongo-Brazzaville som tok over 200 liv førre helg.

Gravferd i Kongo-Brazzaville etter eksplosjonen

Gravferd for over 200 menneske etter eksplosjonen i Kongo-Brazzaville

Foto: Junior D. Kannah / Afp

Dei etterlatne etter ofra samla seg i seks store, kvite telt som var sett opp i sentrum av hovudstaden Brazzaville, der over 200 kister var plasserte.

Den kongolesiske presidenten Denis Sassou Nguesso og kona Antoinette

Den kongolesiske presidenten Denis Sassou Nguesso og kona Antoinette deltok i minnegudstenesta.

Foto: GUY-GERVAIS KITINA / Afp

I området rundt hadde tusenvis av menneske møtt opp for å heidre dei døde.

Den kongolesiske presidenten Denis Sassou Nguesso og kona Antoniette stod vakt då lastebilar som frakta kistene kom fram til minnegudstenesta. Kistene blei frakta ti om gongen på lastebiltilhengarar.

223 menneske omkom og over 2300 blei såra då eit ammunisjonslager i Brazzaville gjekk i lufta.

LES: 200 døde i eksplosjon i Brazzaville

Massegravferd i Kongo-Brazzaville

Det var stort oppmøte av journalistar under massegravferda i Kongo-Brazzaville. Her framfor ei rekke av dei 140 kistene som blei frakta til minnegudstenesta.

Foto: GUY-GERVAIS KITINA / Afp

Over 14000 menneske blei heimlause etter trykkbølgja og brannar som følgde i etterkant av eksplosjonen. Årsaka var truleg ei kortslutning i det elektriske anlegget.

Panikk

Panikk spreidde seg frå Brazzaville over Kongo-elva til Kinshasa, der mange vindauge blei smadra av lufttrykket etter eksplosjonen.

Ei ung kvinne mista mor, far og fire søsken.

– Det var eit apokalypse, seier Jeanette Nuongui som er den einaste i familien som overlevde.

Mor, far, to søstrer og brør omkom då heimen blei rasert av eksplosjonen og brannane som ramma byen.

LES: Fortvilelse i Brazzaville

Skadde i Kongo Brazzaville

Over 2300 blei skadde då ammunisjonslageret i eit bustadstrøk i Kongo-Brazzaville gjekk i lufta.

Foto: Elie Mbena / Ap

– Det er eit guds under at eg overlevde. Men det er ingenting att, sa 36 år gamle Nuongui til nyheitsbyrået AFP. Ho ligg sjølv på det militære sjukehuset i Brazzaville.

Starta i eit bustadområde

Lageret der eksplosjonen skjedde var plassert i militærleiren Mpila, som igjen ligg i eit bustadsområde i den austlege delen av Brazzaville.

Ei rekke bygningar i byen blei totalt øydelagde i eksplosjonen.

Mange av dei døde og skadde var kledd i militære uniformar, og fleire av dei omkomne skal ha vore kyrkjegjengarar som blei innesperra i samanraste bygningar.

Laster innhold, vennligst vent..
Laster innhold, vennligst vent..

SISTE NYTT

Siste nytt