Det var ved 18-tida i kveld at helvete starta igjen i Bagdad. Til saman 11 kraftige bombeeksplosjonar ramma i hovudsak sjiamuslimske nabolag i løpet av kort tid, og det var drepne og såra i alle angrepa.
Angrepa var retta mot moskear, marknadsplassar, kafear og til og med iskremkioskar. Det dødelegaste angrepet var då to bilbomber ramma like ved fleire restaurantar og butikkar i den nordaustlege drabantbyen Husseinniyha, også eit sjiamuslimsk område. Her vart ni drepne og 32 såra, melder AFP.
Verste sidan 2008
Valdsbruken i Irak har ikkje vore så ille som no sidan 2008, då landet var på randa av full borgarkrig. Berre i august i år vart 804 menneske drepne i ulike angrep i Irak, medan talet for dei åtte første månadene i år er over 8000. Det er over 1000 menneske i månaden i snitt.
Ingen har teke på seg skulda for angrepa i kveld, men alle spor peikar på den irakiske greina av terrororganisasjonen Al Qaida.
Observatørar meiner at borgarkrigen i Syria har ført til auka uro også i Irak. Irakiske Al Qaida og andre ekstreme sunnimuslimske grupper støttar opprørarane i Syria.
Ein talsmann for den irakiske statsministeren Noiri al-Malawi meiner at dei amerikanske truslane om eit militært angrep på Syria, har fått opprørarar til å intensivere angrepa sine også i Irak.
– Ingen høyrer på oss
– Vi har åtvara om dette, men uheldigvis, det er ingen som høyrer på oss, sa talsmann Ali al-Moussawi i kveld.
Både sunnimuslimske og sjiamuslimske religiøse og politiske leiarar har bede tilhengjarane sine om å stanse angrepa, utan at det har gitt resultat i form av mindre vald. Tvert i mot ser valdsbruken ut til å bli verre for kvar dag som går.
Også andre stader i Irak har det vore mange angrep i dag, slik at talet på drepne i løpet av dagen ser ut til å bli minst 67. Fleire hundre andre er såra.
LES OGSÅ:
LES OGSÅ:
LES OGSÅ: