Madsen i retten: – Eg parterte ikkje Kim Wall

Madsen var frå før sikta for aktlaust drap og for likskjending. Han har sete varetektsfengsla sidan 12. august. Påtalemakta ba i dag retten om å forlengje varetektsfengslinga, og fekk medhald.

Siktinga er også skjerpa til forsettleg drap. Han skal dessutan gjennomgå ei rettspsykiatrisk undersøking.

Fengslingsmøtet starta ved 14-tida. Etter ei stund blei det bestemt at møtet skulle gå for opne dører. I møtet las aktor Jakob Buch-Jepsen opp Madsen si forklaring frå avhøyret 12. august. Deretter svarte Madsen på spørsmål både frå aktor og forsvararen, Betina Hald Engmark.

70 kilo tung luke

Madsen har tidlegare forklart at Kim Wall (30) døydde som følgje av ei ulukke om bord. Wall var ute på reportasjetur med Madsen.

• Les også: Madsen erkjenner likskjending

I løpet av fengslingsmøtet har detaljane i Madsen si forklaring komme for ein dag. Han seier at Wall døydde etter at dei to hadde gått ned på djupt vatn med ubåten. Etter at dei kom opp til overflata, skulle dei gå opp på kommandobrua.

For å komme dit, måtte dei gå ut gjennom ei 70 kilo tung luke. Madsen heldt i luka, men då Wall skulle opp, glei han og miste taket, slik at luka fall i hovudet på henne. Det blødde kraftig frå hovudet hennar. Ho fekk kraniebrot og døydde straks, ifølgje Madsen si forklaring, som blir referert av Ekstrabladet.

Nektar for å ha partert Wall

Han fekk panikk, men forklarer at han seinare la seg til å sove i ein annan del av ubåten. Han sov eit par timar.

Han meinte det ikkje var sømmeleg at Wall skulle få ubåten som si grav. Han seglde derfor ut i Øresund, og fekk henne opp frå botnen av ubåten ved hjelp av eit tau. Så knytte han saman beina hennar, og dumpa henne ut i vatnet, fortel han.

I staden for å kontakte politi og redningsteneste, bestemte Madsen seg for å senke ubåten, og å ta sitt eige liv. Årsaka skulle vere at «dei sinnssjuke eksperimenta» hans no hadde ført til at ein annan person døydde.

Han trudde ikkje at han ville få lyst til å segle med ubåten igjen etter det som hadde skjedd.

Madsen opna ventilane, slik at ubåten gjekk ned. Madsen hevdar at han ikkje la skjul på dette i det første avhøyret med politiet.

Men han gjekk bort frå planen om å ta sitt eige liv, og blei redda i land etter at ubåten hadde gått ned.

Kroppen til Wall blei seinare funnen utan armar, bein og hovud. Men i retten nektar Madsen for at det er han som har partert henne.

Hadde aldri møtt henne

Madsen får spørsmål om han kjende Wall frå før. Han seier at han ikkje kan hugse å ha sett henne tidlegare.

Han seier også at det ikkje var nokon seksuell kontakt mellom dei.

Aktor stiller spørsmål om han har hatt med seg andre kvinner om bord i båten. Han stadfester at han nyleg inviterte ei kvinne til å bli med.

Aktor spør vidare om han har vore ein del av eit SM-miljø, for sadomasochistisk sex.

– Det har eg. Eg er eit menneske som interesserer meg for erotikkens mangfald. Og eg har vore på ei mengde sex-festar kalla «Kinky Salon», skriv Ekstrabladet.

Aktor legg seinare fram forklaringa til eit vitne som seier at ho har hatt seksuell omgang med Madsen om bord på ubåten.

Vedgjekk likskjending

Madsen har tidlegare nekta straffskuld for drap, men har altså i retten i dag erkjent likskjending i og med at han dumpa Kim Wall i havet.

Madsen ba i fengslingsmøtet om at han skulle bli sett fri frå varetekt.

• Les også: – Madsen var i området der japansk turist ble funnet drept
• Les også: Film om Peter Madsen tatt av plakaten

– Det er ikkje snakk om at min klient frivillig vil la seg fengsle lenger. Og han ønskjer no å forklare seg i retten, sa Engmark til danske TV 2 før fengslingsmøtet starta.

– Når ein nektar seg skuldig i drap, vil ein ikkje la seg fengsle frivillig, sa Engmark. Men ho fekk altså ikkje medhald.

Har endra forklaring

Madsen reiste ut frå København i den privatbygde ubåten UC3 Nautilus ved 19-tida torsdag 10. august. Med på turen var den svenske journalisten Kim Wall (30). Wall skulle lage ein reportasje om Madsen for eit amerikansk magasin.

I løpet av natta blei Wall meld sakna av kjærasten. Dagen etter blei båten funnen i Køge Bugt sør for København. Båten gjekk ned, og Madsen kom seg i land. Der blei han pågripen av politiet.

• Les også: «Ubåt-Madsens» plan: Ville sende seg selv ut i verdensrommet i hjemmelaget rakett

Politiet sine undersøkingar viste at båten blei senka med vilje.

Madsen forklarte først at han hadde sett Wall i land ved Refshaleøen, der turen starta. Seinare endra han forklaring. Han sa då at Wall døydde som følgje av i ulukke om bord, og at han dumpa henne i havet.

Ei og ei halv veke etter at ho blei meld sakna, blei Wall sin kropp, utan armar, bein og hovud, funnen ved Amager i København.