Lockdown og vaksinemangel skaper frustrasjon i Australia

Forseinka vaksineutrulling kan halde Australia stengt ut 2022. No må statsministeren svare for utviklinga.

Australias storby Sydney er nedstengt.

Australias største by Sydney er stengt ned i to veker. Innbyggarane får berre lov til å gå ut for å utføre viktig arbeid, handle mat, trene eller oppsøke helsetenesta.

Foto: LOREN ELLIOTT / Reuters

Eit skilt i eit butikkvindauge i Sydney set fingeren på frustrasjonen mange australiarar opplever no.

– Kjære kundar, vi vil vere stengt i overskodeleg framtid fordi Scott Morrison er eit ubrukeleg pikkhovud som berre bestilte nok vaksinar til å vaksinere 4 prosent av befolkninga, 18 månadar inn i ein pandemi, skriv eigaren av butikken.

Ein butikkeigar i Sydney, Australia er misnøgd med den mangelfulle vaksineringa i landet.
Foto: Skjermdump frå Twitter, tatt 29.06.2021.

Statsminister Scott Morrison får krass kritikk frå både folk og politikarar for det dei meiner er svikt i å sikre nok vaksinar til landet.

Berre 4 prosent av befolkninga er fullvaksinerte når landet no står overfor eit smitteutbrot av delta-varianten. Dei siste 14 dagane er 287 persona registrert smitta, og trenden er aukande.

Delta-variant truar

Australia vart først hylla for at dei klarte å få kvardagen og økonomien på fot igjen. Dei innførte tidleg strenge koronarestriksjonar, og det er berre meldt om 910 dødsfall så langt i pandemien.

Men med den nye delta-varianten som truar verda over, har over 10 av landets 25 millionar innbyggarar måtte gå i lockdown. Totalt 20 millionar er ramma av koronarestriksjonar i forskjellige formar.

Folk tar framleis turen til Bondi Beach trass i at Sydney er stengt ned.

Store byar som Sydney, Brisbane, Perth og Darwin er under lockdown. Folk besøker likevel den populære stranda Bondi Beach i Sydney.

Foto: STEVEN SAPHORE / AFP

Australiarane er redde for at dei er spesielt sårbare mot den ekstra smittsame koronavarianten. Det er nemleg berre 1 million av dei som er fullvaksinerte.

Skrota vaksineringsmål

Og det er det mange som skuldar statsminister Scott Morrison for. Emneknaggen #ScottyDoesNothing har blitt ein trend på Twitter.

På denne lista er Australia nedst på lista over land som prosentvis har vaksinert befolkninga.
Foto: Skjermdump frå Twitter, tatt 29.06.2021.

Utrullinga av vaksinar har nemleg blitt kraftig forseinka i Australia.

Først sa myndigheitene at alle ville vere fullvaksinerte innan oktober. No er det målet heilt skrota.

Vaksineprogrammet til Australia lente seg i stor grad på AstraZeneca. Først kom det langt færre leveransar enn først antatt, deretter blei det klart at vaksinen kunne forårsake blodpropp som biverknad.

Australia sin statsminister Scott Morrison

Statsminister Scott Morrison har mykje kritikk å svare på.

Foto: THOMAS SAMSON / AFP

No kan forseinkingane gjere at Australia må halde stengt ut 2022.

Helsemyndigheitene håper å oppnå flokkimmunitet når 80 prosent er fullvaksinerte, og først då vil grensene bli opna. Statsminister Morrison seier det er mogleg dei ikkje når 80 prosent-målet før midten av 2022. Han vil heller ikkje garantere at alt er opent innan jul neste år.

– Morrison bestilte ikkje nok vaksinar

Opposisjonen har også sett sitt snitt til å kritisere regjeringa.

– Medan verda opnar opp, stenger Australia ned. Og det er fordi Scott Morrison ikkje bestilte nok vaksinar, tvitrar Anthony Albanese, leiaren av det største opposisjonspartiet Labor.

Det australske opposisjonspartiet Labor ser sitt snitt til å kritiske regjeringas handtering av pandemien.
Foto: Skjermdump frå Twitter, tatt 29.06.2021.

Opposisjonen klandrar også Morrison for å ikkje ha eit godt nok karantenesystem.

Det har vore 24 tilfelle der viruset har smitta frå hotell til befolkninga gjennom sikkerheitsvakter eller reinhaldarar, og fleire reisande har også dokumentert at dei har blitt smitta på karantenehotellet.

Morrison meiner vaksineringa vil setje fart frå juli av, då Pfizer-leveransane vil auke. Til dess ber han folk, spesielt dei i Sydney i New South Wales, om å vere tolmodige.

– Australiarar har vist ein enorm styrke gjennom pandemien. Eg er sikker på at folka i New South Wales vil overvinne denne siste utfordringa, seier statsministeren.

SISTE NYTT

Siste nytt