Flyktningsituasjonen i verda blir verre år for år. Dette går fram av årsrapporten for 2015 frå FNs flyktningbyrå, UNHCR, som vart offentleggjort i dag. Og det er ikkje lysteleg lesing.
Kvart 113. menneske på jorda er på flukt. Om det var eit land ville det vere det 21. største landet verda. Det er fleire menneske på flukt i verda enn det er innbyggjarar i Storbritannia. Av dei 65 millionar menneska som er på flukt, så er 40 millionar av dei flyktningar i eige land.
Syria, Afghanistan og Somalia
12,4 millionar nye menneske kom inn i statistikken i løpet av 2015.
44 prosent av alle flyktningar i verda kjem frå tre land, Syria, Afghanistan og Somalia
FNs generalsekretær Ban Ki-moon seier det slik:
– Vi har i dag den verste flyktningkrisa i vår tid. Det er viktig å tenkje på at dette ikkje berre ei krise som handlar om høge tal, men at det også er ei solidaritetskrise, seier han.
Born under 18 år utgjorde 51 prosent av flyktningane i 2015. Til samanlikning var talet 41 prosent i 2009.
98.400 born, som var på flukt utan foreldre eller andre føresette, søkte asyl i 78 ulike land. I hovudsak kjem desse borna frå Afghanistan, Sudan, Somalia og Den sentralafrikanske republikk.
Flest asylsøknader i Tyskland
Rundt to millionar menneske søkte asyl eller flyktningstatus i 2015. Flest søkte asyl i Tyskland (441.900), USA (172.000), Sverige (156.400) og Russland (152.500). Ved utgangen av 2015 venta rundt 3,2 millionar asylsøkjarar på eit svar på søknaden.
Krigsherja Syria er som venta det landet med flest menneske på flukt. 11,7 millionar syrarar var fordrivne frå heimane sine ved utgangen av 2015. Mange har reist til andre land, men fleirtalet av dei er på flukt inne i Syria.
Kommunikasjonsmedarbeidar Anders Aalbu i UNHCR i Nord-Europa gir oss dette perspektivet på den internasjonale flyktningkrisa:
– 24 menneske blir tvungne på flukt kvart minutt. Det blir 34.000 per dag. Halvparten av flyktningane er born, og 90 prosent av dei oppheld seg i utviklingsland, seier han. Han minner også om at tre land produserer halvparten av flyktningane i verda, Syria, Afghanistan og Somalia.
2,5 mill. i Tyrkia
Aalbu fortel at Tyrkia er det landet i verda som tek mot flest flyktningar. Det bur 2,5 millionar menneske på flukt i landet i dag. Pakistan kjem som nummer to med 1,6 millionar menneske, medan Libanon kjem på tredjeplass med 1,1 millionar menneske.
Så kjem Iran med 979.400, Etiopia med 736.000 og Jordan med 664.100.
I forhold til folketalet er det Libanon som tek mot flest flyktningar, og dei fleste som er i Libanon kjem frå Syria