Måndag morgon vakna fleire ukrainarar i fleire byar opp til eksplosjonar.
Kyiv-ordførar Vitali Klitschko bekreftar på meldingstenesta Telegram at det er snakk fleire eksplosjonar i hovudstaden.
Avisa Bildt melder at visumkontoret til det tyske konsulatet i Kyiv også er treft.
Styresmaktene i Kyiv hevdar at Russland skaut opp 75 missil måndag morgon, skriv nyheitsbyrået AFP.
Russlands president Putin bekreftar måndag kl. 12 at Russland står bak angrepa.
Minst fem drepne
Ukrainas president Zelenskyj seier at måla var infrastruktur knytt til energi og befolkninga.
Zelenskyj seier det er meldt om fleire skadde og døde i eksplosjonane.
– Dei forsøker å øydeleggja oss og utsletta oss frå jordas overflate. Øydeleggja våre folk som søv heime i Zaporizjzja – drepa folk som går på jobb i Dnipro og Kyiv, uttaler han.
Rostyslav Smirnov i det ukrainske innanriksdepartementet skriv på Telegram at minst åtte er drepne og 24 er skadde i Kyiv. Politiet opplyser at minst fem som er drepne og 12 som er skadde i eksplosjonane.
Det blir også meldt om eksplosjonar i dei ukrainske byane Lviv, Ternopil, Dnipro og Odesa.
Guvernøren i Lviv oppmodar folk i byen til å halda seg innandørs.
Første åtak på mange månadar
Det var AFP sine journalistar i Kyiv som melde om å ha høyrt tre kraftige eksplosjonar rundt 08:15-tida lokal tid, og at flyarmen gjekk om lag ein time tidlegare.
Rundt klokka 08:35-tida melde ukrainske medium om nye eksplosjonar i hovudstaden.
Innbyggjarar blir oppmoda til å halda seg i tryggleik i bomberom og metroen, skrev ordføraren på Telegram.
Ifølgje Anton Gerasjenko, som er rådgivar i det ukrainske innanriksdepartementet, har straumen gått i fleire av områda som er trefte.
Dette er første gongen på mange månadar at Kyiv blir råka. Eksplosjonane ser også ut til å vera mykje meir sentrale enn russiske angrep tidlegare i krigen, skriv BBC som også har eit team i den ukrainske hovudstaden.
Russiske gjengjeldingar
Meldingane om eksplosjonane i Kyiv kjem berre eit par dagar etter eksplosjonane på Kertsjbrua.
Søndag kalla Russlands president Vladimir Putin angrepet på brua ei terrorhandling og meiner at det er den ukrainske etterretningstenesta SBU som står bak.
Ukrainske styresmakter har så langt ikkje sagt at dei står bak, men Zelenskyjs rådgivar Mikhajlo Podoljak posta laurdag ei melding på Twitter at brannen berre er «ei byrjing» og at «alt ulovleg må øydeleggjast og at alt som er stole må returnerast til Ukraina».
Tormod Heier, som er militærstrateg og professor på Forsvarets høgskole, meiner angrepet på brua er ein viktig symbolsiger for Ukraina og at Russland no vil hemna seg.
– Det kan definitivt sjå ut som russisk gjengjelding, seier han om angrepa mot dei ukrainske byane måndag.
– Det er veldig nært i tid og er angrep som kjem med missil som må ha vore godkjent på høgste nivå i Kreml, legg han til.
Samstundes trur han ikkje at missilangrepa mot dei ukrainske storbyane vil ha noka militær effekt sidan det ikkje blir følgt opp med styrkar på bakken.
Frå russisk side meiner han at hensikta truleg var å påverka befolkninga, men at effekten kan bli motsett.
– Det som ofte er erfaringa, og det som vi har sett så langt i krigen, er at denne typen angrep eigentleg berre bidreg til eit endå sterkare samhald og sinne blant ukrainarane, seier Heier.
President Putin skal i dag leia eit møte i det russiske sikkerheitsrådet. Kva som står på dagsorden, er ikkje kjent.
Følgj utviklinga i NRK sitt Nyheitssenter: