Tre miste livet i Tyskland og ein i Nederland. Ein mann omkom i den tyske landsbyen Gross Santersleben då han hamna under ein betongvegg som kollapsa. I Motabaur omkom to vegarbeidarar då eit tre velta og fall over bilen dei sat i.
I byen Ede i Nederland omkom ein mann då delar av taket på eit kjøpesenter fall ned på han. Uveret har fått namnet «Niklas».
Vindkast på 160 km/t
Den nasjonale vertenesta i Tyskland melder om vindkast på opptil 160 kilometer i timen i høgareliggjande område. I storbyen München i den sørlege delen av landet var vinden så kraftig at fotgjengarar og syklistar vart blåste over ende.
Rundt 140 flygingar frå den travle flyplassen i Frankfurt am Main i Tyskland vart innstilte på grunn av uveret, og på Schipol i Amsterdam vart 80 flygingar innstilte. I hamnebyen Rotterdam, Europas travlaste hamn, vart to konteinarterminalar stengde, og skip som låg ved kai måtte gå ut i open sjø.
Også vegtrafikken og jernbanen vart hardt ramma av uveret med vegar og jernbaneliner stengde av trefall.
Ramma fleire land
Uveret gjorde skade også i Belgia, Tsjekkia og Storbritannia. I Vissingen på grensa mellom Nederland og Belgia gjekk eit 300 meter langt skip på grunn, men taubåtar greidde å skipet flytande igjen.
I Storbritannia vart det natt til tysdag målt vindkast på 156 kilometer i timen. Ei av dei større bruene over Themsen var stengt i fleire timar på grunn av uveret, og det førte til trafikkaos i morgontrafikken.
Det er truleg gjort skade for fleire hundre millionar kroner i uveret, trur representantar for forsikringsselskapa.