Kraftig Eritrea-kritikk i ny FN-rapport

Om ein skal tru rapporten FN i dag la fram, så er det lite teikn på betring når det gjeld menneskerettar i Eritrea.

• LES FN SI PRESSMELDING OM RAPPORTEN

Noreg har i fleire år vore i kontakt med Eritrea om ein retur av norske asylsøkarar til det austafrikanske landet.

To regjeringar har vore i samtaler

Allereie i 2012 sa dåverande statssekretær i justisdepartementet Pål Lønseth (Ap) til Klassekampen at dei var i kontakt med Eritrea om ein returavtale.

Og i førre veke var ein delegasjon frå justisdepartementet, med statssekretær Jøran Kallmyr (Frp) i spissen, på besøk i Eritrea. Det var eit sjeldan besøk frå vestlege styresmakter til den lukka eittpartistaten.

Moglege endringar og oppmjuking av Eritreas militærplikt har fått den norske regjeringa til å sjekke moglegheitene for ein returavtale med diktaturet.

• LES OGSÅ: Sender observatører til Eritrea
• LES OGSÅ: Advarer mot returavtale med Eritrea

– Men først må Noreg ta ei vurdering av tilstanden i landet, sa statssekretær i justisdepartementet, Jøran Kallmyr til NRK i går.

​Og i dag får han svar frå FN sin spesialobservatør til Eritrea, Sheila B Keetharuth, som legg fram ein menneskerettsrapport i Genève, slik FNs høgkommissær for menneskerettar har gjort fleire gonger dei siste åra.

– Granskingskommisjonen har funne systematiske, utbreidde og grove menneskerettsbrot som blir og har blitt utført i Eritrea under mandat frå regjeringa, slår den 484-siders lange rapporten fast.

• LES OGSÅ: Eritreisk flyktning: – Frykter regimets folk i Norge

– Styresmaktene oppmodar til tortur

Dei som står bak rapporten hevdar også at Eritrea har operert etter «skyt for å drepe»-prinsippet langs landets grenser. Med andre ord hevdar dei at politiet langs grensene til Etiopia og Sudan har lov til å skyte folk som prøver å forlate landet ulovleg.

• LES OGSÅ: – Dei utset seg for ein dødsrisiko ved å flykte

Rapporten seier også at slaveliknande praksis og tortur er såpass vanleg at ein kan konkludere med at Eritreas styresmakter oppmodar til tortur.

– Kommisjonen konkluderer med at regjeringa er ansvarlege for utbreidd bruk av tortur påført eritrearar over heile landet, står det å lese i rapporten.

Den omstridde militærtenesta, som også Kallmyr og den norske regjeringa vil vite meir om, er også omtalt i rapporten.

(Saka held fram under biletet)

FN får ikkje komme inn i landet

I rapporten omtaler FN ein person som hevdar han var i militæret i heile 17 år før han fekk til å flykte. Andre vitne fortel at menneske har blitt avretta fordi dei nekta å la seg verve til militæret. Dette skal ha skjedd så seint som i 2013.

• LES OGSÅ: Eritreere misbruker norsk asylsystem og reiser til hjemlandet

FN sin spesialobservatør hevdar også at FN fleire gonger har forsøkt å få lov til å besøke Eritrea dei siste tre åra, utan hell.

Granskingskommisjonen har også sendt brev til eritreiske styresmakter og bedt om informasjon og samarbeid, men utan å få svar.

Mellom seks og ti prosent av verdas eritrearar er registrerte som FN-flyktningar, og i Noreg utgjer dei den tredje største flyktninggruppa, etter syrarar og somaliarar.

• LES OGSÅ: – Eritrea er et moderne slaveri