Det er politiet si avdeling for økonomisk kriminalitet som har gjennomført ransakinga av fleire regjeringskontor. Talsmann for politiavdelinga, Pavel Hantak, seier at 400 politifolk deltok i aksjonen.
Det vart gjennomført ransaking av statsministeren sitt kontor, forsvarsdepartementet og fleire andre regjeringskontor. Politiet har også raida rådhuset i Praha og heimane til fleire mektige forretningsmenn.
– 20 arresterte
Fleire er arresterte, nokre meldingar seier at så mange som 20 no er i politiet si varetekt. Jana Nagyova, som er kontorsjef hos statsministeren, er blant dei arresterte.
Jana Nagyova er ein svært nær medarbeidar av statsministeren, og ifølgje rykta i det politiske miljøet i Praha er forholdet mellom dei to ikkje berre profesjonelt. Så tett skal det vere at Nagyova blir sagt å vere årsaka til at Petr Necas er i ferd med å ta ut skilsmisse frå kona si.
Hantak seier i kveld at dei har etterforska saka i fleire månader. Statsminister Petr Necas sjølv avviser kravet frå Det sosialdemokratiske partiet om å gå av.
– Ingen grunn til å gå av
– Eg er over tydd om at eg ikkje har gjort noko ulovleg, det har heller ikkje medarbeidarane mine eller Jana Nagyova. Såleis er det ingen grunn for meg å vurdere å gå av og forårsake regjeringa sitt fall, seier Necas i ein kommentar.
Petr Necas har hatt kampen mot korrupsjon som ei av fanesakene sine sidan han inntok statsministerstolen i 2010.
Politiske observatørar i Praha seier at arrestasjonane i natt kan vere det som skal til for å velte sentrum/høgre-koalisjonen til Necas. Koalisjonen har alt overlevd heile sju mistillitsforslag i parlamentet.
Mykje korrupsjon
Korrupsjon har vore eit stor problem i Tsjekkia. Korrupsjons-vaktbikkja Transparency International plasserte Tsjekkia på 54. plass i kåringa av dei mest korrupte landa i verda. Tsjekkia kom verre ut enn blant andre Costa Rica og Rwanda.
Det økonomiske frisleppet etter Fløyelsrevolusjonen i 1989 har gitt Tsjekkia ein del utfordringar på dette feltet. Skuldingar om utbreidd korrupsjon har ramma dei fleste av regjeringane i landet, men ingen i ansvarlege stillingar i regjeringsapparatet har hittil vorte dømde.
LES OGSÅ:
LES OGSÅ:
LES OGSÅ: