Politiet i Stockholm fekk melding like etter klokka 10.30 om at ein politimann var stukken med kniv. Han var på patrulje ved Medborgarplatsen på Södermalm i Stockholm då angrepet skjedde. Knivstikkinga skal ha skjedd heilt uprovosert, melder Aftonbladet.
Politiet i Stockholm har sendt ut ei pressemelding der dei stadfestar at ein politimann er knivstukken, men skadane skal ikkje vere livstrugande. Politiet melder også dei har arrestert ein person som er mistenkt for drapsforsøk.
Uprovosert angrep
Vitne seier til Aftonbladet at gjerningsmannen sneik seg opp bak politimannen, og hogg han uprovosert i nakken. Ein kollega av politimannen sprang etter personen som stakk, og arresterte den mistenkte.
Politiet har no stengt av store delar av Medborgarplatsen, t-banen og ein barnehage med rundt 70 barn, melder Expressen.
Passa på demonstrasjon
Den siste tida har det vore ein demonstrasjon på trappa til Medborgarhuset på Medborgarplatsen. Ifølge Aftonbladet var politiet på plassen for å passe på at dei som demonstrerte var trygge.
– Vi veit ikkje kva som har skjedd, men eg håper politimannen klarer seg, seier Fatemeh Khavari, som er talsperson for Ung i Sverige, som arrangerer demonstrasjonen, til Aftonbladet.