Kim Jong-un dukka opp på gjødselfabrikk

Viss dette stemmer og blir stadfesta, kan det setje ein stoppar for veker med spekulasjonar rundt eineherskaren si helse og arverekkefølgja i det lukka landet.

Ifølgje KCNA klipte Kim bandet ved opninga av ein ny gjødselfabrikk i Sunchon nord for hovudstaden Pyongyang fredag, og han vart motteken med «torande applaus» og hurrarop.

Etter innviinga inspiserte han ifølgje nyheitsbyrået fabrikken og gav uttrykk for at bestefaren hans, Kim Il-sung, og faren Kim Jong-il ville ha vore svært fornøgde om dei hadde høyrt om fabrikken.

Bilde som er viste på sørkoreansk fjernsyn, er oppgitt å vere frå fredag denne veka, ifølgje det sørkoreanske nyheitsbyrået Yonhap.

Rykta starta etter veker med tausheit

Kim har ikkje vist seg offentleg sidan han var til stades ved eit møte i leiinga av arbeidarpartiet i landet 11. april, og det har vore spekulert i om han var død eller alvorleg sjuk etter hjarteoperasjon.

• Nye spekulasjoner: Kims tog har stått ved luksusferiested i nesten én uke

USA sin president Donald Trump, som tidlegare har ønskt Kim Jong-un god betring, ville ikkje kommentere dei nye opplysningane fredag kveld.

Satellittbildet avslørte gøymestad

Mykje tyder på at han kan ha halde til på feriestaden sin i Wonsan som ligg på austkysten av landet, ut mot Japanhavet. Toget hans er observert på stasjonen der av amerikanske satellittar.

Det er mogleg at frykt for koronasmitte har ført til at han har halde seg i ro.

• Tror koronafrykt har sendt Kim Jong-un i skjul

Rykta rundt helsetilstanden til leiaren har ført til mange spekulasjonar rundt arverekkefølgja i landet. Både Kim sin bestefar og far var døde i to dagar før nokon utanfor den inste marksirkelen i Nord-Korea visste noko som helst.

Søstera, Kim Yo-jong, har vore nemnd mange gonger som ein mogeleg etterfølgjar dei siste vekene.

• Kim Jong-uns søster er en mystisk kvinne

Vil du ha nyheitsbrev frå NRK Urix? Meld deg på her.