Harris har valt Tim Walz som vise­president­kandidat

Visepresidenten har valt sin visepresidentkandidat.

60 år gamle Tim Walz blir Kamala Harris sin nummer to i presidentvalet 2024.

I han får Harris ein visepresidentkandidat som er kjend som jordnær, pragmatisk og liberal.

Walz skriv på X at han er «all in».

– Visepresident Harris viser oss moglegheitens politikk. Det minner meg litt om første skuledag. Så lat oss få dette til, folkens! skriv han.

Saman skal dei to inn i valkampen for Det demokratiske partiet. Der skal dei kjempe mot Donald Trump og JD Vance frå Det republikanske partiet.

Ny taktikk mot Trump

Walz er guvernør i Minnesota. Sjølv om han er godt likt i sin eigen heimstat, er han er ikkje veldig kjend blant amerikanarane.

Men han fekk mykje merksemd etter eit intervju med MSNBC der han karakteriserte Trump og Vance som «rare».

Det slo an. Klippet gjekk viralt, og taktikken fekk fotfeste innad i Det demokratiske partiet også.

Trumps politiske motstandarar har vore opptatte av å framstille han som ein fare for demokratiet.

Men Walz’ meir humoristiske angrepsvinkel, der han får fram kor merkelege nokre av utspela til Trump og Vance har vore, ser ut til å nå fleire.

Klassisk arbeidarbakgrunn

Ifølge amerikanske medium var personleg kjemi viktig for Harris då ho skulle velje sin nummer to. Som visepresident til Joe Biden veit ho godt kor tett dei to skal jobbe saman.

Sjølv skriv Biden på X at Harris val av visepresidentkandidat er ei «flott avgjerd».

Walz er kjend for å vere jordnær og pragmatisk.

Han vaks opp blant 3000 andre i bygda West Point og tok utdanninga si på eit lokalt, lite universitet.

Før han blei guvernør, var Walz historielærar og trenar for eit fotballag ved ein lokal skule. Han er også ein militærveteran.

– Han har ein klassisk amerikansk arbeidarklassebakgrunn, seier USA-ekspert Sofie Høgestøl, førsteamanuensis ved Universitetet i Oslo.

Det kan vere ein stor fordel for Harris. Ho er sjølv frå ein liberal stat, studerte juss på eit universitet med kallenamnet «black Harvard» og har høgt utdanna foreldre.

– Er det éin ting Demokratane har slite med dei siste vala, så er det å nå distriktsveljarane, seier Høgestøl.

Harris gjer det godt i fleire store byar og urbane miljø. Men når ein kjem ut på landsbygda, er det Republikanarane som vinn.

Og Minnesota ligg i det såkalla rustbeltet i USA, som Trump prøver å appellere til.

– Walz sin hovudjobb i haust blir å appellere til tradisjonelle veljarar i Midtvesten, trur Høgestøl.

«Full pakke»

Professor i statsvitskap og USA-ekspert Hilmar Mjelde kan godt sjå kvifor Harris valde Walz over dei andre kandidatane.

– Tim Walz er full pakke. Han har politisk erfaring frå øvste nivå, har vore den tonesettande kritikaren til Trump dei siste vekene og er populær i alle delar av partiet, seier han.

– Det kan bli ein kraftfull kombinasjon. Dette betyr at Demokratane no endeleg er klare til å sette i gang valkampen mot Trump, seier Mjelde.

Men Harris tar også ein risiko med å velje Minnesota-guvernøren, trur Mjelde, fordi han kan vere for venstreorientert for mange veljarar.

Walz blir nemleg sett på som svært progressiv, og har sterke band med fagforeiningane.

Som guvernør har han innført eigne delstatsreglar for foreldrepermisjon, beskytta rettane til transpersonar, innført gratis skulemat og jobba med å legalisere marijuana.

Ikkje frå ein vippestat

Amerikanske medium hadde på førehand peikt ut seks namn som favorittar. Måndag var det snevra inn til desse tre:

• Pennsylvania-guvernør Josh Shapiro (51)
• Arizona-senator Mark Kelly (60)
• Minnesota-guvernør Tim Waltz (60)

Alle kandidatane er kvite menn. Det tyda på at Harris ville velje ein som kan trekke moglege veljarar vekk frå Trump, meinte fleire kommentatorar.

Men i motsetnad til Shapiro og Kelly, er ikkje Walz frå ein stat som er kritisk for Harris i valet.

– Slik sett er valet litt dristig. Harris slit ikkje med å vinne Minnesota, så det kan slå tilbake på henne seinare, om ho taper ein vippestat ho kunne hatt ein visepresident frå, trur Høgestøl.

Walz er heller ikkje særleg kjend blant amerikanarane, noko som kan gi Republikanarane ein sjanse til å definere han før han rekk å gjere det sjølv.

Høgestøl er spent på å sjå om dei prøver å «svartmale» han som ein venstreradikal, slik dei prøver å gjere med Harris.

Ein rask prosess

Det har vore ein virvelvind av ein valsommar i USA.

Tysdag morgon norsk tid blei det annonsert at Harris er Demokratane sin presidentkandidat med god margin.

Ho har berre hatt nokre veker på seg til å velje sin visepresidentkandidat, ein prosess som vanlegvis tek fleire månadar.

Tysdag legg Harris og Walz etter planen ut på ein fire dagar lang turné, mellom anna til fleire vippestatar. Det heile startar med eit valmøte i Philadelphia i Pennsylvania.

Mange har tolka det som eit teikn på at Josh Shapiro låg an til å bli visepresidentkandidat, men det var altså til slutt Walz som landa stillinga.

Interessert i utanrikssaker? Høyr utanriksredaksjonen sin podkast: